ئۆكرانیا.. نێردراوانی تایبەتی ترەمپ لەگەڵ زیلینیسكی كۆبوونەوە

پەیام

نێردراوانی تایبەتی سەرۆكی ئەمریكا لە شاری كیێڤی پایتەخت لەگەڵ سەرۆكی ئۆكرانیا كۆ بوونەوە. 

ئەمڕۆ، یەكشەممە، ستیڤ ویتكۆف و جارید كوشنەر نێردراوانی تایبەتی دۆناڵد ترەمپ سەرۆكی ئەمریكا لەگەڵ ڤلۆدیمێر زیلینیسكی سەرۆكی ئۆكرانیا كۆ بوونەوە.

 ویتكۆڤ و كۆشنەر پێشتر بۆ ماوەی سێ كاتژمێر لە مۆسكۆ لەگەڵ ڤلادیمێر پوتین سەرۆكی ڕووسیا وەك هەوڵێكی نوێی ئەمریكا بۆ كۆتاییهێنان بە جەنگ كۆ بوونەوە.

لەوبارەوە ئاژانسی ڕۆیتەرز ئاماژەی بەوە كردووە كە دانوستانەكانی مۆسكۆ هیچ پێشكەوتنێكی بەرچاوی بەدەست نەهێناوە، بەڵام پوتین كۆبوونەوەكەی بە زۆر سوودبەخش ناوبردووە.

بەرپرسێكی كۆشكی سپی ڕایگەیاند: هەنگاوە دیپلۆماسییەكانی داهاتوو لە هەفتەكانی داهاتوودا ڕادەگەیەنرێن.

لای خۆیەوە و بەر لە كۆبوونەوەكەی لەگەڵ شاندە ئەمریكییەكە، زیلێنسكی جەختی لە پێویستی دەستەبەركردنی گەرەنتی ئەمنی و گەیشتن بە ئاشتییەكی بە شكۆ كردەوە و ڕایشیگەیاند: ئۆكرانیا كۆتاییهاتنی جەنگی دەوێت، بۆ ئەوەش پێشنیازی خۆمان ئامادەیە.

لە لایەكی دیكەیشەوە، ڕاوێژكارانی ئاسایشی نیشتمانی لە وڵاتانی بەریتانیا و فەرەنسا و ئەڵمانیاش بۆ بەشداری لە هەوڵە دیپلۆماسییەكاندا گەیشتوونەتە كیێڤ.