عێراق.. داوای ڕووبەڕووبوونەوەی هۆكارەكانی پیسبوونی ژینگە دەكرێت

پەیام

وەزارەتی ژینگەی عێراق بە فەرمی باری نائاسایی ژینگەیی لە سەرانسەری وڵاتدا ڕاگەیاند و داوای جووڵەی حكومیی بەپەلە و ‏هەمەلایەنە دەكات بۆ ڕووبەڕووبوونەوەی پیسبوون و هۆكارەكانی. 

ئەم هەنگاوە هاوكاتە لەگەڵ ڕاگەیاندنی پلاتفۆرمێكی نیشتمانی بۆ ‏چاودێریكردنی سەرپێچییە ژینگەییەكان و وەڵامدانەوەی خێرایان.

لە كۆبوونەوەیەكی فراواندا كە بەرپرسان و پەرلەمانتاران ئامادەی ‏بوون، جەخت لەوە كرایەوە كە دۆخی ژینگەیی عێراق گەیشتووەتە قۆناغێكی مەترسیدار و پێویستیی بە ڕێكاری نائاسایی هەیە. 

پلانی ‏داهاتوو پشت بە داتا وردەكان دەبەستێت بۆ دیاریكردنی قەبارەی پیسبوون و سەرچاوەكان و لایەنە بەرپرسەكان، بە مەبەستی ‏چارەسەركردنی بنەڕەتیی كێشەكان. 

هەروەها جەخت لەوە كرایەوە كە پاراستنی ژینگە بەرپرسیارێتییەكی هاوبەشی نێوان دامەزراوەكانی ‏دەوڵەتە، ئەمەش پێویستیی بە دابینكردنی توانای دارایی و تەكنیكی و بەهێزكردنی هەماهەنگیی حكومەتی هەیە. 

لە كۆتایی ‏كۆبوونەوەكەدا بڕیار درا پلانێكی فریاگوزاری دابڕێژرێت كە كاراكردنی بەرپرسیارێتیی یاسایی بەرامبەر تێكدەرانی ژینگە بگرێتەوە، ‏بەتایبەت دوای هۆشدارییە پەرلەمانییەكان لەبارەی پیسبوونی مەترسیداری ئاوی هەردوو ڕووباری دیجلە و فورات كە مەترسیی ‏گەورەی تەندروستییان بۆ هاووڵاتییان و ژینگەی وڵاتەكە دروست كردووە.