به‌ریتانیا.. به‌ هۆی گومان له‌ بوونی ته‌قه‌مه‌نی؛ ده‌ورووبه‌ری بنكه‌یه‌كی ئاسمانی چۆڵ كرا

په‌یام

پۆلیسی بەریتانیا ڕەوشی لەناکاوی لە نزیک بنکەی ئاسمانیی فێرفۆرد ڕاگەیاند و چەند کەسێکی بە تۆمەتی پێشێلکردنی یاسای تەقەمەنییەکان دەستگیرکرد، هاوکات دەستی بە چۆڵکردنی ناوچەکە و سەپاندنی پشتێنەیەکی ئەمنی کرد. 

ڕووداوەکە لە گوندی وێڵفۆرد لە باشووری ڕۆژئاوای ئینگلتەرا ڕوویداوە، کە دەکەوێتە تەنیشت بنکەی ئاسمانیی فێرفۆردی سەر بە هێزی ئاسمانیی شاهانەی بەریتانیا و لەلایەن هێزەکانی ئەمریکاشەوە بەکاردەهێنرێت. پۆلیسی گڵۆستەرشێر ژمارەیەک لە دانیشتووانی گوندەکەی بۆ سەنتەرێکی کات بەسەربردن لە نزیک ناوچەکە گواستووەتەوە و بە مەبەستی پاراستنی ئاسایش، ڕێگاکانی دەوروبەری بنکە ئاسمانییەکەیان داخستووە. 

بەپێی زانیارییەکانی تۆڕی سکای نیوز، پۆلیس چەند پیاوێکی بە گومانی سەرپێچیکردنی یاسای تەقەمەنییەکان دەستگیرکردووە، ئەمەش دوای توندوتۆڵکردنی ڕێکارە ئەمنییەکان لە دەوروبەری بنکەکە. هەروەها تیمێکی پسپۆڕی سوپای بەریتانیا بۆ مامەڵەکردن لەگەڵ تەقەمەنی سەرقاڵی پشکنینی چەند ئۆتۆمبێلێکن لە ناوچەکەدا و پرۆسەی چۆڵکردنی دانیشتووان بەردەوامە. 

پەیامنێری تۆڕی سکای نیوز گواستوویەتییەوە، پۆلیس ناسنامە و ژمارەی دەستگیرکراوەکانی ئاشکرا نەکردووە. دەسەڵاتداران لەم جۆرە ڕووداوە هەستیارانەدا بە توندی زانیارییەکان دەپارێزن و پێش ڕووداوەکان ناکەون، بۆیە وردەکارییەکانی پەیوەست بە پاڵنەرەکان، ئینتیماکان، یان جۆری تەقەمەنییەکان بڵاوناکەنەوە تاوەکو لێکۆڵینەوەکان تەواو نەبن و کۆنگرەیەکی ڕۆژنامەوانیی فەرمی بۆ ڕای گشتی ئەنجام نەدرێت. 

لەگەڵ هەموو ئەمانەشدا، پۆلیسی بەریتانیا جەختی لەوە کردووەتەوە کە دۆخەکە لەژێر کۆنتڕۆڵدایە و ڕووداوەکە سنووردار کراوە. تا ئێستاش هیچ پەیوەندییەکی ڕاستەوخۆ لەنێوان دەستگیرکردنەکان یان پرۆسە ئەمنییەکە لەگەڵ خودی بنکە ئاسمانییەکەدا پشتڕاست نەکراوەتەوە.