فڕۆكه‌یه‌كی ئیماراتی كه‌ له‌ ڕێگا بووه‌ به‌ره‌و ئیسرائیل ئـاڕاسته‌كه‌ی گۆڕی

فڕۆکەیەکی کۆمپانیای "فلای دوبەی" کە ١٥٠ سەرنشینی ئیسرائیلی هەڵگرتبوو و لە ڕێگادا بوو بەرەو تەل ئەبیب دوای گەیشتنی بە ئاسمانی ئوردون ئاراستەکەی گۆڕی و  ئەمەش گومانی ڕفاندنی فڕۆکەکەی لێکەوتەوە. 

بەپێی زانیارییەکانی ڕادیۆی سوپای ئیسرائیل، فڕۆکەکە لە گەشتێکدا لە دوبەیەوە بەرەو تەل ئەبیب لە ئاسمانی ئوردونەوە بەرەو ئاسمانی شانیشینی عەرەبستانی سعودییە ئاڕاستەی گۆڕیوە و لەو کاتەدا هێمای فریاگوزاری و داوای هاوکاری چالاک کردووە. هاوکات ڕۆژنامەی "یدیعوت ئاحرۆنۆت" پشتڕاستی کردەوە کە نزیکەی ١٥٠ سەرنشینی ئیسرائیلی لەناو فڕۆکەکەدا هەن. 

بەهۆی دروستبوونی گومان لە ئەگەری ڕفاندنی فڕۆکەکە، دوای ئەوەی لە ئاسمانی سعودییەوە دووبارە ئاڕاستەی گەشتەکەی بەرەو ئیسرائیل دەستکاری کردەوە، فڕۆکە جەنگییەکانی هێزی ئاسمانی ئیسرائیل کەوتنە حاڵەتی ئامادەباشییەوە و ڕەوانە کران. لەلایەکی دیکەوە، کەناڵی ١٣ی ئیسرائیلی ڕایگەیاند هەوڵەکان بۆ بەستنی پەیوەندی لەگەڵ فڕۆکەوانەکە تا ئێستا شکستیان هێناوە، فڕۆکەکە لە ڕادارەکانی بەدواداچوونی فڕۆکەوانی دیار نەماوە و هیچ پەیوەندییەکی لەگەڵدا بەردەست نییە. 

ماڵپەڕی "واڵا" لە سەرچاوە ئیسرائیلییەکانەوە بڵاوی کردەوە، بەپێی هەڵسەنگاندنە ئەمنییەکان چاوەڕوان دەکرێت فڕۆکەکە لەماوەی دە خولەکدا لە خاکی سعودییە بنیشێتەوە و دوای ئەوە وێنەکە ڕوونتر دەبێتەوە. ماڵپەڕەکە ئاماژەی بەوەش کردووە کە بەشێک لە بەرپرسانی ئەمنی پێیان وایە هێشتا ڕووداوەکە وەک ڕفاندن هەژمار ناکرێت.