کێشەی فڕۆکە ئیماراتییەکە ئاشکرا کراو فڕۆکەکە لە سعودیە نیشتەوە

پەیام

فڕۆکەیەکی کۆمپانیای "فلای دوبەی" کە ١٥٠ سەرنشینی ئیسرائیلی هەڵگرتبوو و لە ڕێگادا بوو بەرەو تەل ئەبیب دوای گەیشتنی بە ئاسمانی ئوردون ئاراستەکەی گۆڕی و  دواتر هۆکاری کێشەکەی ئاشکرا کرا. 

بەپێی زانیارییەکانی ڕادیۆی سوپای ئیسرائیل، فڕۆکەکە لە گەشتێکدا لە دوبەیەوە بەرەو تەل ئەبیب لە ئاسمانی ئوردونەوە بەرەو ئاسمانی شانیشینی عەرەبستانی سعودییە ئاڕاستەی گۆڕیوە و لەو کاتەدا هێمای فریاگوزاری و داوای هاوکاری چالاک کردووە. هاوکات ڕۆژنامەی "یدیعوت ئاحرۆنۆت" پشتڕاستی کردەوە کە نزیکەی ١٥٠ سەرنشینی ئیسرائیلی لەناو فڕۆکەکەدا هەن. 

بەهۆی دروستبوونی گومان لە ئەگەری ڕفاندنی فڕۆکەکە، دوای ئەوەی لە ئاسمانی سعودییەوە دووبارە ئاڕاستەی گەشتەکەی بەرەو ئیسرائیل دەستکاری کردەوە، فڕۆکە جەنگییەکانی هێزی ئاسمانی ئیسرائیل کەوتنە حاڵەتی ئامادەباشییەوە و ڕەوانە کران. لەلایەکی دیکەوە، کەناڵی ١٣ی ئیسرائیلی ڕایگەیاند هەوڵەکان بۆ بەستنی پەیوەندی لەگەڵ فڕۆکەوانەکە تا ئێستا شکستیان هێناوە، فڕۆکەکە لە ڕادارەکانی بەدواداچوونی فڕۆکەوانی دیار نەماوە و هیچ پەیوەندییەکی لەگەڵدا بەردەست نییە. 

ماڵپەڕی "واڵا" لە سەرچاوە ئیسرائیلییەکانەوە بڵاوی کردەوە، دوای بەدواداچوونی وردی دەزگا ئەمنییەکانی ئیسرائیل دەرکەوتووە کە تیمی فڕۆکەوانی فڕۆکە ئیماراتییەکە لەناو خۆیاندا بووەتە شەڕیان و ئەو کێشەیەش هۆکار بووە بۆ ئەوەی کە فڕۆکەکە هێمای فریاگوزاری بنێرێت و بە نزمییەکی زۆر بفڕێت کە دواتر ئاراستەکەی گۆڕیوە و لە فڕۆکەخانەی تەبووکی رۆژاوای سعودییە بنیشێتەوە.