ئه‌ڵمانیا: پشتیوانی ئۆكرانیا ده‌كه‌ین و به‌رده‌وام ده‌بین

په‌یام

ڕاوێژکاری ئەڵمانیا لە میانی سەردانێکیدا بۆ کیێڤ بە یاوەری بەڕێوەبەرانی کۆمپانیا سەربازییەکانی ئەڵمانیا، بەڵێنی بەردەوامیی پشتگیریی بەرلین بۆ ئۆکرانیا و دابینکردنی هاوکاریی ملیارێک و ٣٥٠ ملیۆن یۆرۆیی دا. 

سەردانەکەی فرێدریش مێرتس، ڕاوێژکاری ئەڵمانیا بۆ کیێڤ  وەک هێمایەکی پشتیوانی بۆ ڤۆلۆدیمێر زێلێنسکی، سەرۆکی ئۆکرانیا ئەنجامدرا. بەرپرسانی حکومەتی ئەڵمانیا ئاشکرایان کردووە کە مێرتس لەم سەردانەیدا پاکێجێکی هاوکاری ڕادەگەیەنێت کە لە یەک ملیار یۆرۆ هاوکاریی سەربازی و ٣٥٠ ملیۆن یۆرۆ بۆ نۆژەنکردنەوەی ژێرخانی کەرتی وزە پێکدێت. 

لە لایەکی دیکەوە، چاوەڕوان دەکرێت لە میانی سەردانەکەدا کۆتایی بە ڕێککەوتنی بەرهەمهێنانی هاوبەشی جۆرەها فڕۆکەی بێفڕۆکەوان، مووشەک و نەرمەکاڵای پەیوەندیدار بهێنرێت. پێشتریش سەرۆکی ئۆکرانیا دوای پەیوەندییەکی تەلەفۆنی لەگەڵ مێرتس جەختی لەوە کردبووەوە کە کیێڤ بەم زووانە ڕێککەوتنەکە لەگەڵ بەرلین کۆتایی پێدەهێنێت. 

لەگەڵ پەرەسەندنی هێرشەکانی ڕووسیا بۆ سەر شارەکان، باڵەخانەکانی نیشتەجێبوون و وێستگەکانی گەرمکردنەوە، مێرتس ئاماژەی بەوە کرد ئۆکرانیا لە هەفتەکانی داهاتوودا پێویستی بە تەواوی پشتیوانییەکان هەیە. ڕاوێژکاری ئەڵمانیا ڕاشیگەیاند بە سەرۆک زێلێنسکی دەڵێت دەتوانێت بەردەوام پشتبەستوو بێت بە هاوکارییەکانیان.