ترامپ: ترس هەبووە بۆمبهاوێژەکانمان لە بەریتانیا بکرێنە ئامانج

پەیام

سەرۆکی ئەمریکا ئەوەی ڕاگەیاند، کشانەوەی فڕۆکە بۆمبهاوێژەکانی ئەمریکا لە بەریتانیا بەهۆی «مەترسییەکانی پەیوەست بە ئێران»ەوە بووە و ترس هەبووە لەلایەن ئەو وڵاتەوە بکرێنە ئامانج. 

پاش ئەوەی فڕۆکە بۆمبهاوێژە ستراتیژییەکانی ئەمریکا لە بنکەی ئاسمانیی «فێرفۆرد» لە باشووری ڕۆژئاوای بەریتانیا کشێنرانەوە، دۆناڵد ترامپ، سەرۆکی ویلایەتە یەکگرتووەکانی ئەمریکا، ئاشکرای کرد کە هۆکاری ئەو بڕیارە بوونی جۆرێک لە «مەترسی» بووە کە ئاراستەی ئەو فڕۆکانە کرابوو. 

ترامپ لە لێدوانێکدا بۆ ڕۆژنامەنووسان لە کۆشکی سپی ڕایگەیاند، لەپێناو پاراستنی فڕۆکەکان لە هەر پەلامارێک و بۆ ئەوەی نە‌کەونە بەر دەستی نەیاران، بڕیار دراوە شوێنەکەیان کەمێک بگۆڕن و بۆ شوێنێکی دوورتر. هەروەها جەختی کردەوە ئەو لایەنانەی لە پشتەوەی ئەو مەترسییانە‌وەن ناسراون و پەیوەندییان بە کۆماری ئیسلامیی ئێرانە‌وە هەیە. 

لە لایەکی دیکەوە، جەی دی ڤانس، جێگری سەرۆکی ویلایەتە یەکگرتووەکانی ئەمریکا ئاماژەی بەوە کرد بڕیاری کشاندنەوەی ئەو فڕۆکە‌ بۆمبهاوێژانە لە بەریتانیا، تەنیا وەک ڕێکارێکی ئاسایی و لەبابەتی گرتنەبەری ئەوپەڕی وشیاری و ڕێوشوێنی ئەمنی بووە.