ئێران: له‌گه‌ڵ ئه‌مریكا دوورین له‌ ڕێكه‌وتن

په‌یام

بەرپرسێکی باڵای ئێران ڕایگەیاند تاران و واشنتن هێشتا لە ڕێککەوتن دوورن، سەرەڕای هه‌وڵی وڵاتانی نێوه‌ندگیر بۆ پێشگرتن لە دەستپێکردنەوەی شەڕ. 
ئەو بەرپرسە باڵایەی ئێران، ڕۆژی سێشەممە بە ئاژانسی ڕۆیتەرزی ڕاگەیاند کە سەرەڕای هەوڵی چڕی وڵاتانی نێوه‌ندگیر بۆ کەمکردنەوەی جیاوازییەکان، هه‌ردوو وڵات هێشتا لە ڕێککەوتن دوورن. ئەم دۆخەش هاوکاتە لەگەڵ ئەنجامدانی هێرشی سەربازیی ئەمریکا بۆ سەر دوورگەی قشم و هەڕەشەی ئێران بە وەڵامدانەوەیەک کە پابەندی هیچ سنوورێکی جوگرافی نابێت.

ناوبراو پێداگری کرد لەسەر پێویستیی جێبەجێکردنی مەرجەکانی تاران بۆ کردنەوەی گەرووی هورمز پێش دەستپێکردنی گفتوگۆ ئەتۆمییەکان.
ئەم لێدوانانە هاوکات بوون لەگەڵ سەردانی ئێوارەی ڕۆژی دووشەممەی دیبلۆماتكارانی قەتەر بۆ تاران، بە مەبەستی تاوتوێکردنی ڕەشنووسی ڕێککەوتنێکی نێوان ئەمریکا و ئێران کە ماوەی هەشت ڕۆژە دانوستانی لەسەر دەکرێت. بەرپرسە ئێرانییەکە هەر پێشکەوتنێکی لە دۆسیەی ئەتۆمیدا گرێ دا بە جێبەجێکردنی مەرجەکانی ئێران لەبارەی گەرووی هورمزەوە.
لە لایەکی دیکەوە، محەممەد باقر قالیباف، سەرۆکی پەرلەمانی ئێران ڕایگەیاند ئێران لەبەرانبەر هەڕەشە و کردەوەی سەربازیدا تەسلیم نابێت و وەڵامی تاران بۆ هەر هەڵەسەنگاندنێکی هەڵەی ئەمریکا چاوەڕواننەکراو دەبێت و بە هیچ سنوورێکی جوگرافییەوە دەستبەستراو نابێت؛ هاوکات بەرپرسە ئێرانییەکەش بۆ ڕۆیتەرز دووپاتی کردەوە وڵاتەکەی بە توندی وەڵامی هێرشەکانی ئەمریکا لە ناوچەکە و تەنانەت لە دەرەوەی ناوچەکەش دەداتەوە.