پارێزگای میسان... ٥٩ قوتابی تووشی تەنگەنەفەسی بوون و گەیەنرانە نەخۆشخانە

پەیام
فەرمانگەی تەندروستیی میسان گەیاندنی ٥٩ خوێندکاری کچی بەهۆی تەنگەنەفەسییەوە بۆ نەخۆشخانە ڕاگەیاند و جەختی کردەوە دۆخی تەندروستیی سەرجەمیان جێگیرە و پێویستیان بە خەواندن لە نەخۆشخانە نەبووە. 
محەمەد کەنانی، بەڕێوەبەری ڕاگەیاندنی تەندروستیی میسان لە لێدوانێکدا بۆ ئاژانسی هەواڵی عێراقی (واع) ئاشکرای کرد کە نەخۆشخانەکانی پارێزگاکە ٥٩ حاڵەتی تەنگەنەفەسییان لەنێو خوێندکارانی قوتابخانەی «ئەلزەهرا»ـی کچان پێگەیشتووە. ناوبراو ڕوونی کردەوە کە دەستبەجێ خوێندکارەکان لە ڕێگەی ئۆتۆمبێلەکانی فریاکەوتنەوە گوازراونەتەوە بۆ بەشەکانی فریاکەوتنی خێرا لە نەخۆشخانەکان بە مەبەستی وەرگرتنی چارەسەری پزیشکی. 
کەنانی دڵنیایی دا کە دۆخی تەندروستیی سەرجەم خوێندکارەکان لە ئێستادا جێگیرە و تا ئێستا هیچ حاڵەتێکی مانەوە لە نەخۆشخانە تۆمار نەکراوە. هاوکات ئاماژەی بەوەش کرد کە فەرمانگەی تەندروستی، بە سەرۆکایەتیی بەڕێوەبەری گشتی و بەڕێوەبەری بەشی ئۆپراسیۆنەکان، لە چوارچێوەی ڕێکارەکانی وەڵامدانەوەی خێرا بۆ حاڵەتە لەناکاوەکان، بە بەردەوامی و لە نزیکەوە چاودێریی ڕەوشی تەندروستیی تووشبووان دەکات.