عەراقچی: بۆ تاوتوێ كردنی پێشهاتەكان گفتوگۆم لەگەڵ 12 وڵات كردووە

پەیام    

وەزیری دەرەوەی ئێران پەیوەندی لەگەڵ ژمارەیەك لە وڵاتانی هەرێمایەتی چڕ دەكاتەوە و داوا دەكات ڕێكخستنی ئەمنی لەسەر بنەمای هاریكاری نێوان وڵاتانی ناوچەكە دوور لە دەستێوەردانی دەرەكی بنیاد بنرێت.
لە هەژماری خۆی لە ئینستاگرام، عەباس عەراقچی، وەزیری دەرەوەی ئێران ئاشكرای كرد كە لە 48 كاتژمێری ڕابردوو لەگەڵ هاوتاكانی لە 12 وڵات لەبارەی جموجوڵە گوماناوییەكانی ئەمریكا و ئیسرائیل لە ناوچەكە گفتوگۆی كردووە و جەختی لە مافی ئێران بۆ بەرگریكردن لە ئاسایشی نەتەوەیی و سەروەرییەكەی كردووەتەوە.

عەراقچی ڕایشیگەیاند: لەگەڵ عومان، میسر، ئوردون، سعوودیە، قەتەر، كوەیت، ئیمارات، قوبڕوس، توركیا، تونس، عێراق و پاكستان گفتوگۆی كردووە و سەرنجی لەسەر پێشهاتە هەرێمایەتی و نێودەوڵەتیەكان و دەرەنجامی هەنگاوەكانی ئەمریكا و ئیسرائیل داوە.
بەپێی نووسراوەكەی، لەو پەیوەندییانەدا، وەزیری دەرەوەی ئێران جەختیشی لە پێویستی ڕێزگرتن لە سەروەریی وڵاتان و وەستاندنی كردەوە دوژمنكارییەكان و هەڕەشەكان و دەستێوەردانی دەرەكی كردووەتەوە.