پوتن: سێشەممە دانوستانی سێقۆڵی روسیا و ئەمریكا و ئۆكرانیا دەستپێدەكات

پەیام   

ڤلادیمیر پوتن سەرۆكی روسیا رایگەیاند، رۆژی سێشەممەی داهاتوو گفتوگۆی سێقۆڵی لە نێوان روسیا و ئەمریكا و ئۆكرانیا لە ئیمارات دەستپێدەكات.
پوتن لە كۆبوونەوەیەكی كارگێڕیی لەگەڵ ئەندامانی هەمیشەیی ئەنجومەنی ئاسایشی وڵاتەكەی رایگەیاند، بڕیارە رۆژی سێشەممەی داهاتوو، گفتوگۆی سێقۆڵی لە بارەی دۆسێی ئۆكرانیا لە ئیمارات دەستپێبكات.

ڕاشیگەیاند، چەند لێپرسراوێكی روسیای بۆ ئەو ئەركە داناوە و پێویستە ئامادەكارییەكانیان تەواو كردبێت و ئاگاداری ناوخۆی روسیاش بن لەبارەی ئاسایشی وزە و خۆراك و سەرنجیان تەنها لەسەر دەرەوەی وڵاتەكەیان نەبێت.

كۆشكی كرملنیش رایگەیاندووە، ڤلادیمیر مەدینسكی و یوری ئۆشاكۆڤ یاریدەدەرانی پوتن و چەند لێپرسراوێكی وەزارەتی دەرەوە و سوپاش بەشداری دانوستانەكان دەكەن.
بڕیاریشە دانوستانەكانی نێوان روسیا و ئەمریكا و ئۆكرانیا لە ئیمارات، دوور لە چاوی میدیاكان و بە داخراوی ئەنجام بدرێن.