کوکوریا لە نێوان پرێمەرلیگ و لالیگا خۆی یەکلا کردەوە

پەیام سپۆڕت - مەڕوان تاڵیب

مارک کوکوریای بەرگریکاری ڕیاڵ مەدرید، ئاردا گولەری وەک باشترین یاریزانی ئێستای یانەی شاهانە دەستنیشان کرد.

 کوکوریا لە لێدوانێکدا بۆ ڕادیۆی "کۆپێ"ـی وڵاتەکەی وتی: ئاردا گولەر بەهایەکی تەکتیکیی زۆر تایبەت بە تیپەکە دەبەخشێت کە هەمووان لێی تێناگەن؛ شێوازی یاریکردنی ڕیاڵ مەدرید بە شێوەیەکی ڕوون دەگۆڕێت، چونکە خاوەنی بینینێکی ناوازەیە لە دروستکردنی دەرفەت و داڕشتنی هێرشەکاندا.

بەرگریکارەکەی قەڵای سپی بەرگرییەکی توندی لە ڤینیسیۆس کرد لە بەرانبەر ئەو ڕەخنانەی لەم دواییانەدا لێی دەگیرێن و ڕایگەیاند، ڤینی لە ماوەی پێنج ساڵی ڕابردوودا ئاستێکی بێوێنە و بەردەوامی پێشکەش کردووە، زۆر ئاسایی و سروشتییە کە هەر یاریزانێکی گەورە لە قۆناغێکدا تووشی پاشەکشەیەکی کاتی ببێت، بەڵام ئەو هەمیشە لە نێو مەشقەکاندا بەوپەڕی دڵسۆزییەوە شەڕ دەکات.

کوکوریا لە کۆتایی قسەکانیدا بەراوردی نێوان خولی ئیسپانی و خولی نایابی ئینگلیزی کرد و ڕوونیکردەوە، کوالیتی هونەریی یاریزانان لە ئیسپانیادا بەرزترە و یارییەکان زیاتر پشت بە ڕێکخستنی تەکتیکی دەبەستن، لە کاتێکدا پرێمەرلیگ بە فشارێکی جەستەیی بێوێنە و ڕیتمێکی کراوە و زۆر خێرا جیا دەکرێتەوە کە تا دوا ساتەکان هێور نابێتەوە و پێشی وایە ڕیال مەدرید لە ئێستادا باشترین تیپی ئەوروپایە.