کۆبوونەوەیەکی بەپەلە لە نێوان کاریک و برۆنۆ فێرناندێز کراوە

پەیام سپۆڕت - مەڕوان تاڵیب

کۆبوونەوەی بەپەلەی کاریک و برۆنۆ فێرناندێز بۆ هێورکردنەوەی دۆخی ناوخۆی مانچستەر یونایتد بەڕێوەچووە.

 لە هەنگاوێکی نوێدا بۆ کۆنترۆڵکردنی قەیرانەکان و هێورکردنەوەی کەشی ژووری جلگۆڕین، تۆڕی «سکای سپۆرتس» ئاشکرای کرد کە مایکل کاریک، ڕاهێنەری مانچستەر یونایتد، کۆبوونەوەیەکی ڕاستەوخۆ و تایبەتی لەگەڵ برۆنۆ فێرناندێزی کاپتنی تیپەکە ئەنجام داوە.

ئامانجی سەرەکیی ئەم دانیشتنە چارەسەرکردنی ناکۆکییە ناوخۆیییەکان و کۆتاییهێنان بووە بەو گرژییانەی لە چەند ڕۆژی ڕابردوودا لە نێوان کاریک و سەرکردەکانی ناو یاریگە دروست ببوو، تاکو تیپەکە لە قۆناغی هەستیاری داهاتوودا سەرنجی تەواوی لەسەر یارییەکان بێت.

بەپێی زانیارییەکانی سەرچاوەکە، کاریک و برۆنۆ لەسەر ئەوە ڕێککەوتوون کە ناکۆکییە کەسییەکان وەلا بنێن و هەموو تواناکانیان یەکبخەن لەپێناو راستکردنەوەی ڕێڕەوی شەیتانە سوورەکان لەم وەرزەدا؛ هەردوولا جەختیان لەسەر ئەوە کردووەتەوە کە بەرژەوەندیی یانەکە لە سەرووی هەموو شتێکەوەیە و پێویستە بە پەلە ئاست و ئەنجامەکان باشتر بکرێن تاکو وەرزی یانەکە لە مەترسیی داڕمان ڕزگار بکرێت.