06/09/2025
320 جار خوێنراوەتەوە
كۆشكی سپی هەوڵ دەدات لە كۆنگرێس دەنگدان لەسەر گۆڕینی ناوی وەزارەتی بەرگری نەکرێت
پەیام
كۆشكی سپی بەدوای ڕێگایەك بۆ دووركەوتنەوە لە دەنگدان لە كۆنگرێس سەبارەت بە گۆڕینی ناوی وەزارەتی بەرگری بە وەزارەتی جەنگ دەگەڕێت، بەرپرسانی وەزارەتەكەش بەهۆی خەرجییە زۆرەكانیەوە لە ناوگۆڕینەكە بێزار و تووڕەن.
ڕۆژنامەی پۆلیتیكۆ لە زاری سەرچاوەیەكی ئاگادارەوە ڕایگەیاند: بە فەڕمی گۆڕینی ناوی وەزارەتی بەرگری ئەمریكا بۆ وەزارەتی جەنگ پێویستی بە ڕەزامەندی كۆنگرێس دەبێت و كۆشكی سپییش لە هەوڵی دۆزینەوەی ڕێگایەكدایە بۆ خۆدزینەوە لەو دەنگدانە.
سەرچاوەكە ئاماژەی بەوەشداوە "بەرپرسانی پنتاگۆن تووڕەیی و بێزاری و سەرسوڕمانی خۆیان لەبارەی گۆڕینی ناوی وەزارەتی بەرگری بە وەزارەتی جەنگ دەربڕیوە، چونكە جێبەجێكردنی ئەو بڕیارە ملیارەها دۆلاری بۆ گۆڕینی هێما و دروشم و لافیتەی لە 700 هەزار پێگە لە 40 وڵاتی جیهاندا پێویستە.
بەپێی ڕۆژنامەكە پێنتاگۆن وای دەبینێت گۆڕینی ناوی وەزارەت هاوكاری ویلایەتە یەكگرتووەكان بۆ ڕووبەڕووبوونەوەی ڕكابەرەكانی ناكات.
دۆناڵد ترەمپ سەرۆكی ئەمریكا لە مەڕاسیمێكدا گۆڕینی ناوی وەزارەتی بەرگری ئەمریكای بۆ وەزارەتی جەنگ واژوو كرد، بڕیارەكەشی بە ڕەنگدانەوەی بارودۆخی ئێستای جیهان وێنا كرد.
لە تۆڕە کۆمەڵایەتیەکان شەیری بکە