بەهۆی گەمارۆوە لە مانگی نۆدا تەنیا 10%ـی هاوكارییەكان گەیشتوونەتە غـ.ەززە

پەیام 

لە مانگی ڕابردوودا تەنیا لەسەدا 10 ی ئەو بڕە هاوكارییەی پێویست بووە گەیشتووەتە كەرتی غەززە.

نووسینگەی ڕاگەیاندنی حكومەت لە غەززە ڕایگەیاند، لە كۆی 18 هەزار بارهەڵگری هاوكاری كە بڕیاربووە لە مانگی ئەیلوولدا بگەنە ناو غەززە تەنیا هەزار و 824 بارهەڵگر گەیشتوون، ئەمەش لەسەدا 10 ی كۆی ئەو هاوكارییە بووە، كە پێویستبووە بگات. لەو بڕەیش، كە گەیشتووە زۆرینەی هاوكارییەكان بەهاوكاریی سوپای زایۆنی تووشی تاڵانی بووە و بەهەدەر چووە.

ڕاگەیاندنی حكومەت دەڵێت: زیاتر لە دوو ملیۆن و 400 هەزار هاوولاتیی فەلەستینی لە كەرتی غەززە پێویستیان بەهاوكارییە نزیكەی ملیۆنێكیان منداڵن، ئەو بڕەش، كە گەیشتووە ناتوانێ بە هیچ شێوەیەك پێداویستییەكان دابین بكات.

حكومەتی غەززە جەختی لەوەش كردووەتەوە، بەهۆی تاڵانی و دزی و ئاژاوەوە، كە بەهاوكاریی داگیركەری زایۆنی بەدی دێت، هاوكارییەكان وەك پێویست ناگەنە خەڵك، ئەمەش بەشێكە لە سیاسەتی برسیكردن و ئاژاوە، كە پەیڕەوی دەكات.

ماوەی حەوت مانگە حكومەتی زایۆنی ئابڵوقەی توندی خستووەتە سەر كەرتی غەززە، بەپێی ئامارەكان تا ئێستا ڕێگەی لە 430 بارهەڵگر گرتووە، كە خۆراكی بنەڕەتی و سەرەتایی منداڵان و نەخۆشخان و برسیكراوانی تێدایە.

وەك حكومەتی غەززەش ڕایگەیاندووە، كەرتی غەززە ڕۆژانە پێویستی بە 600 بارهەڵگری هاوكاری هەیە بەڵام كەمتر لە 60 بارهەڵگر دەگات، ئەمەش گرانییەكی بێوێنەی دروست كردووە و لەسەدا 95ی هاووڵاتیان ناتوانن پێداویستیی رۆژانەیان دابین بكەن.