سودانی داوای پێكهێنانی هاوپه‌یمانییه‌ك بۆ ڕاگرتنی جه‌نگ ده‌كات

په‌یام:

سەرۆکوەزیرانی عێراق داوای پێکهێنانی هاوپەیمانێتییەکی دیبلۆماسی بە ‏بەشداریی وڵاتانی ناوچەکە و وڵاتانی یەکێتیی ئەورووپا دەکات، بە ئامانجی "ڕاگرتنی ‏دەستبەجێی جەنگ". 

لە میانەى بەشداریکردنیدا لە کۆنگرەیەکدا بەشێوەی ڤیدیۆ کۆنفرانس، کە سەرۆکی ئەنجوومەنی ئەورووپا و ‏سەرۆکی کۆمیسیۆنی ئەورووپا دەربارەی پەرەسەندنە هەرێمییەکانی ئێستا ڕێکیان ‏خستبوو.  محەمەد شیاع سوودانی، سەرۆکوەزیرانی عێراق، سەرکۆنەی ئەو هێرشانەی کرد کە کراونەتە سەر ‏خاکی عێراق و وتیشی "هەڵوێستی عێراق جێگیرە لە ‏ڕەتکردنەوەی بەکارهێنانی خاک یان ئاسمانی بۆ هێرشکردن یان ئەنجامدانی چالاکییە ‏سەربازییەکان دژی وڵاتانی دراوسێ".‏

محەمەد شیاع سوودانی ڕاشیگەیاند "جەخت لەسەر پاراستنی نێردە ‏دیپلۆماسییەکان دەکەینەوە. بە توندی ئیدانەی بەئامانجگرتنی مەدەنییەکان، دامەزراوە ‏مەدەنی و نەوتی و ئەتۆمییەکان لە ئێران دەکەین".‏

سەرۆکوەزیرانی عێراق داواى کرد هاوپەیمانێتییەکی دیبلۆماسی بە ‏بەشداریی وڵاتانی ناوچەکە و وڵاتانی یەکێتیی ئەورووپا، بە ئامانجی "ڕاگرتنی ‏دەستبەجێی جەنگ" پێک بهێنرێت. ڕاشیگەیاند "پێویستە کۆمەڵەی گشتیی نەتەوە ‏یەکگرتووەکان بڕیارێک بۆ ڕاگرتنی جەنگ دەربکات، ئەنجوومەنی ئاسایشیش ئەرک و ‏بەرپرسیارێتییەکانی خۆی بۆ دەستەبەرکردنی ئاشتی و ئاسایشی نێودەوڵەتی جێبەجێ ‏بکات"