14/06/2025
422 جار خوێنراوەتەوە
عێراق هەوڵی خۆ دوورخستنەوە لە ململانێكانی نێوان ئێران و ئیسرائیل دەدات
پەیام
عێراق بۆ خۆ دوورخستنەوە لە ململانێ سەربازییەكانی نێوان ئێران و قەوارەی زایۆنی پەیوەندی بە هەر یەك لە تاران و واشنتۆنەوە كردووە.
بەرپرسێكی عێراقی كە نەیویستووە ناوی ئاشكرا بكرێت بە ئاژانسی فرانس پرێسی ڕاگەیاندووە: بەغداد داوای لە تاران كردووە لە لێدانی بەرژوەندییەكانی ئەمریكا لە خاكەكەیدا خۆی بەدوور بگرێت.
ئەو بەرپرسەی عێراق وتوشیەتی: ئێران لە داواكەی عێراق تێ دەگات.
لای خۆیشیەوە بەرپرسێكی حكومیی دیكەش كە بەهەمان شێوە نەیویست ناوی ئاشكرا بكرێت ڕایگەیاندووە: عێراق بە فەڕمی داوای لە ویلایەتە یەكگرتووەكان كردووە فڕۆكەكانی ئیسڕائیل ئاسمانی وڵاتەكەی نەبەزێنن، جەختیشی لەسەر ڕێزگرتن لە سەروەری عێراق و سەلامەتی بواری ئاسمانی كردووەتەوە.
بەرپرسە حكومییەكەی عێراق ڕایشیگەیاندووە: بەهۆی ئەوەی ئەمریكا فەرماندەیی هاوپەیمانیی نێودەوڵەتیی دژ بە داعش دەكات دەبێت بەرپرسیاریەتی ڕێگری لە هەر پێشێلكارییەك بگرێتە ئەستۆ كە زیانی بۆ ئاسایشی عێراق هەبێت و ئارامی بخاتە مەترسییەوە.
بەرپرسێكی ئەمنیی عێراقیش بە ئاژانسی فرانس پرێسی ڕاگەیاند: هەمووان بە گروپە چەكدارە عێراقییەكانیشەوە، هاوكارن لەگەڵ حكومەت بۆ دوورخستنەوەی عێراق لەو ململانێیە.
لە تۆڕە کۆمەڵایەتیەکان شەیری بکە