ته‌رمی نۆ كه‌سی دیكه‌ له‌ قوربانیانی ته‌قینه‌وه‌ی كارگه‌یه‌كی مادده‌ كیمیاییه‌كان له‌ ئه‌مریكا دۆزرانه‌وه‌

په‌یام
بەرپرسانی ئەمریکا ڕایانگەیاند ژمارەی قوربانیانی دزەکردنی ماددە کیمیاییەکان لە کارگەیەکی ویلایەتی واشنتۆن بۆ ١١ کەس بەرزبووەوە، ئەمەش دوای ئەوەی تیمەکانی فریاگوزاری تەرمی سەرجەم ئەو نۆ کەسەیان دۆزییەوە کە بێسەروشوین بوون. 
سەرەتای ڕووداوەکە ڕۆژی سێشەممە بوو، کاتێک تەقینەوەیەکی ناوخۆیی لە کۆگایەکی کۆمپانیای (نیپۆن دێناوێف) ڕووی دا. کۆگاکە بڕی زیاتر له‌ سێ ملیۆن لیتر گیراوەی کیمیایی تێدابوو کە لە "سۆدیۆم هیدرۆکسید" و "سۆدیۆم سەڵفاید" پێکهاتبوو و لە پیشەسازیی دروستکردنی هەویرکاری کاغەزدا بەکاردێت.
 لە ساتەکانی سەرەتای ڕووداوەکەدا گیانلەدەستدانی دوو کەس و دیارنه‌مانی نۆ کەسی دیکە ڕاگەیەندرا، بەڵام دوای چەند ڕۆژێک لە گەڕانی بەردەوام لەژێر داروپەردەکاندا بە هاوکاری فڕۆکەی بێفڕۆکەوان، تەرمی سەرجەم بێسەروشوێنبووان دۆزرانەوە. 
ئه‌و كارگه‌یه‌ی كه‌ ته‌قینه‌وه‌كه‌ی تێدا ڕووی دا سەر بە کۆمپانیای (نیپۆن پێپەر ئیندستریز) ی ژاپۆنییە لە شاری لۆنگڤیۆ. به‌شێك له‌ میدیاكانی ئه‌مریكا بڵاویان كرده‌وه‌ كه‌ تاقیکردنەوە ژینگەییەکان دەریانخستووە کە ڕووداوەکە بووەتە هۆی دزەکردنی پیسبوونی کیمیایی بۆ ناو ڕووباری (کۆڵۆمبیا) ی نزیک لە کارگەکە، بەڵام بەرپرسانی ناوخۆیی دڵنیایی دەدەن کە هیچ جۆرە کاریگەرییەکی نەرێنی لەسەر کوالیتی هەوا یان ئاوی خواردنەوەی شاری لۆنگڤیۆ دروست نەکردووە.