مووچەی خاوەن پێداویستییە تایبەتەكانی عێراق بۆ ٢٥٠ هەزار دینار بەرز دەكرێتەوە

پەیام

وەزارەتی كار و كاروباری كۆمەڵایەتیی عێراق لە چاوەڕوانیی تەرخانكردنی بودجەی پێویستدایە بۆ زیادكردنی مووچەی خاوەن پێداویستییە تایبەتەكان.

وەزارەتی كار و كاروباری كۆمەڵایەتیی عێراق ڕایگەیاند، زیادكردنی مووچەی خاوەن پێداویستییە تایبەتەكان لە 170 هەزار دینارەوە بۆ 250 هەزار دینار، لە چاوەڕوانیی تەرخانكردنی بودجەی پێویستدایە.

حەسەن خەوام، وتەبێژی وەزارەت ئاماژەی بە چەندین ئیمتیازاتی دیكە كرد كە لەم یاسایەدا بۆ خاوەن پێداویستییە تایبەتەكان دابین كراوە، لەوانە كەمكردنەوەی 50% لەسەر نرخی بلیتی گەشتكردن بۆ كەسی كەمئەندام و یاوەرەكەی دوو جار لە ساڵێكدا.

هەروەها، توانای هاوردەكردنی ئۆتۆمبێل بەبێ باجی گومرگی، تەرخانكردنی 5%ی هەلی كار لە كاتی دامەزراندن لە وەزارەتە حكومییەكان و ناچاركردنی كەرتی تایبەت بە دامەزراندنی 3%ی كەسانی خاوەن پێداویستی تایبەت.

جێگای سەرنجە كە 5%ی زەویی نیشتەجێبوونیش لەكاتی دابەشكردنیان بۆ ئەم توێژە تەرخان دەكرێت.

ئەم یاسایە ئیمتیازاتی گەورە بە كرێكارانی كەرتی تایبەت دەدات كە هاوتای ئەو ماف و ئیمتیازاتانەیە كە فەرمانبەرانی كەرتی گشتی وەری دەگرن، بەمەش هەنگاوێكی گرنگ دادەنرێت بۆ یەكسانكردنی مافەكانی هەردوو كەرتی حكومی و تایبەت لە بواری خانەنشینی و بیمەی كۆمەڵایەتیدا.