ڕیاڵ مەدرید لە گواستنەوەی یاریزان پلانەکەی دەگۆڕێت

پەیام سپۆڕت - مەڕوان تاڵیب

یانەی ڕیاڵ مەدریدی ئیسپانی بڕیاریداوە سیاسەتی گرێبەستکردن لەگەڵ یاریزانانی نوێ بگۆڕێت و هاوشێوەی وەرزەکانی ڕابردوو نەکات.

 ڕۆژنامەنووسی ئیسپانی، ڕامۆن ئالڤارێز، وردەکارییەکانی سیاسەتی نوێی کارگێڕی یانە شاهانەییەکەی لە گواستنەوەی یاریزاناندا ئاشکرا کرد، کە پشت دەبەستێت بە گرێبەستکردن لەگەڵ یاریزانە خاوەن ئەزموونەکان یان ئەوانەی لە لووتکەی ئاستیاندایە، کە توانای دروستکردنی کاریگەرییەکی خێرا و دەستبەجێیان لەناو تیپەکەدا هەبێت، جگە لە گێڕانی ڕۆڵی سەرکردایەتی لە ئاڕاستەکردنی یاریزانە لاوەکاندا.

لەم چوارچێوەیەدا، ناوی ڕۆدری یاریزانی مانچستەر سیتی وەک یەکێک لە ئامانجە سەرەکییەکان بۆ بەهێزکردنی هێڵی ناوەندی ڕیاڵ مەدرید لە ماوەی گواستنەوەکانی هاوینی داهاتوودا دەرکەوتووە، بەتایبەتی ئەگەر لە بارودۆخێکی جەستەیی باشدا بێت.

سەرچاوەکە ئاماژەی بەوەش کردووە کە یانە مەلەکییەکە پێی وایە ڕۆدری خاوەن کەسایەتییەکی سەرکردە و تێگەیشتنێکی قووڵە بۆ یارییەکان، جگە لە توانای بەرزکردنەوەی ئاستی تیپەکە بە شێوەیەکی خێرا، تەنانەت ئەگەر کاروانە وەرزشییەکەی لەگەڵ یانەکە بۆ ماوەیەکی زۆر درێژخایەنیش نەبێت.

ڕامۆن ئالڤارێز ڕوونیشی دەکاتەوە، ئەم گۆڕانکارییە لە ستراتیژدا بەو مانایە نییە کە ڕیاڵ مەدرید واز لە قۆستنەوەی گواستنەوەی یاریزانان بە خۆڕایی بهێنێت و بیرۆکەی یانەکە فراوانکردنی بازنەی بژاردەکانە بۆ ئەوەی ئەو یاریزانانەش بگرێتەوە کە نزیکن لە لووتکەی ئاستی هونەری خۆیان، لەگەڵ بەردەوامبوونی ئەگەری گرێبەستکردن لەگەڵ یاریزانە لاوەکان کە چاوەڕوانی داهاتوویەکی گەورەیان لێ دەکرێت.