بەرپرسێكی بەغداد: دەبێت هەرێم داهاتەكانى ڕادەست بکات

پەیام 

بەرپرسێكی بەغداد بە توندی وەڵامی وەزارەتی دارایی هەرێم دەداتەوە و جەخت لە بوونی قاچاخچێتی لە دەروازە سنووریەكانی هەرێم دەكاتەوە و دەڵێت دەبێت داهاتەكان ڕادەست بكرێن.

میدیای عێراقی لە زاری بەرپرسێكی حكومیی بەغدادەوە وەڵامی ڕاگەیەنراوەكەی وەزارەتی دارایی حكومەتی ماوەبەسەرچووی هەرێم دەداتەوە و ڕایدەگەیەنێت، هەڵوێستەكەی هەولێر تەنیا "هەوڵێكی ئاشكرایە بۆ هەڵاتن لە ڕاستییە دەستوورییەكان" و بە سیاسەتی بەلاڕێدابردنی سەرنجی خەڵك لە كێشە داراییەكان ناویدەبات.

ئەو سەرچاوەیە كە ناوەكەی ئاشكرا نەكراوە ڕاگەیاندووە؛ كەمبوونەوەی داهاتی ناوخۆ نابێت بكرێتە بیانوو بۆ هێرشكردنە سەر دەروازە فیدراڵییەكان، لەكاتێكدا هەرێم هێشتا خاوەنی سیستەمێكی گومرگیی جیاوازە لە عێراق و ئەوەش پێشێلكردنی سەروەریی دارایی وڵاتە.

هەروەها ئاماژەی بەوە داوە، كە بوونی "قاچاخچێتی" ڕاستییەكی سەلمێنراوە و جیاوازیی تەعریفەی گومرگی وای كردووە بازرگانان ڕوو لە دەروازەكانی هەرێم بكەن.

دەشڵێت، تۆمەتباركردنی بەغدا بە گەندەڵیی، شەرعییەت بە سیاسەتی دارایی سەربەخۆی هەرێم نادات و چارەسەریش بە لێدوانی میدیایی ناكرێت، بەڵكو تەنیا بە پابەندبوونی تەواو بە دەستوور، ڕادەستكردنی داهاتە سیادییەكان و یەكخستنەوەی ئیدارەی دارایی دێتە دی."

پێشتر وەزارەتی دارایی هەرێم لە ڕاگەیەنراوێكیدا بەغدادی بە گەندەڵیی لە دەروازەكان تۆمەتبار كرد و بە هۆكاری ڕاستەقینەی دابەزینی داهاتی ناو هێنا و ڕەتیكردەوە هۆكارەكەی حكومەتی ماوەبەسەرچووی هەرێمی كوردستان بێت.