ئاكسیۆس: ترەمپ هێشتا بڕیاری هێرشى بۆ سەر ئێران نەداوە، بەڵام ئەگەریشى هەیە

پەیام

سەرۆكی ئەمریكا هێشتا بڕیاری هێرشكردنە سەر ئێرانی نەداوە و دەیەوێت تاران پێشنیارێكی باش پێشكەش بكات ئەگەر دەیەوێت ڕێگری لە هێرشكردن بكات.

پێگەی ئاكسیۆس لەزاری ڕاوێژكارێكی دۆناڵد ترەمپ بڵاوی كردەوە سەرۆكی ئەمریكا هێشتا بڕیاری هێرشكردنە سەر ئێرانی نەداوە، بەڵام بژاردەكانی بە كراوەیی هێشتووەتەوە و پێدەچێت لە هەر ساتێكدا بێت بڕیاری هێرشكردن بدات.

بە وتەی ئەو ڕاوێژكارەی ترەمپ، مەرجی ئەمریكا ئەوەیە هیچ ئەگەرێك نەهێڵدرێتەوە بۆ ئەوەی ئێران ببێتە خاوەن چەكی ئەتۆمی و ستیڤ ویتكۆف و جارید كۆشنەر بە عەباس عێراقچی وەزیری دەرەوەی ئێرانیان ڕاگەیاندووە هەڵوێستی ترەمپ بریتیە لە وەستاندنی پیتاندنی یۆرانیۆم لەناوخۆی ئێران.

لەلایەكی ترەوە كۆنگرێسی ئەمریكا ئامادەكاریی دەكات بۆ دەنگدان لەسەر پرۆژەبڕیارێك كە هەر كردەوەیەكی سەربازیی دژی ئێران قەدەغە دەكات ئەگەر ڕەزامەندی پێشوەختە وەرنەگیرێت لەڕێگەی ڕاگەیاندنی جەنگ لەلایەن كۆنگرێس.