وەزارەتی پەروەردەی ئێران: بەهۆى هێرشەکانەوە 195 قوتابی و مامۆستا كوژراون

پەیام 

بەهۆی هێرشەكانی سەر ئێرانەوە تا ئێستا نزیكەی 200 قوتابی و مامۆستا كوژراون دەیان قوتابخانەیش زیانیان بەر كەوتووە.

سەرۆكی ناوەندی ڕاگەیاندنی وەزارەتی پەروەردەی ئێران بە ئاژانسی "ئیرنا"ی ڕاگەیاند: بەهۆی هێرشە كوێرانەكانی ئەمریكا و قەوارەی زایۆنییەوە تا ئێستا 195 خوێندكار و مامۆستا گیانیان لەدەست داوە و زیانیش بەر 68 قوتابخانە لە ناوچە جیاوازەكانی وڵات كەوتووە.

ئەو بەرپرسەی وەزارەتی پەروەردەی ئێران ئاماژەی بەوەش كردووە "ئەو مامۆستا و خوێندكارانە لە ئەنجامی هێرشەكان لەوپەڕی بێتاوانیدا شەهید كراون".

ئەوەیشی خستە ڕوو وەزارەتی پەروەردە پلانی داناوە بۆ ئەوەی پڕۆسەی خوێندن پەكی نەكەوێت و خوێندكارانی ئەو قوتابخانە زیانلێكەوتووانە لە نزیكترین ناوەندی فێركاری جێگیر بكاتەوە.

بەپێی ئامارەكان، تەنیا لە شاری میناب لە پارێزگای هورمزگان 168 خوێندكار و مامۆستا كوژران و 110ی دیكەش بریندار بوون. لە شاری (لامەرد)یش لە پارێزگای فارس، مامۆستایەك و پێنج خوێندكاریش لە هێرشەكاندا كوژراون.

بەهۆی مەترسییەكانی جەنگیشەوە وەزارەتی پەروەردەی ئێران دوای ئەوەی یەكەم ڕۆژی جەنگەكەی وەك پشووی سەرتاسەری ڕاگەیاند، بڕیاری دا دوای تەواوبوونی پرسەی گشتیی بەهۆی تیرۆری ڕێبەری باڵا لە تەواوی ئێران تا كۆتایی ساڵ بەشێوەی ئۆنلاین درێژە بە خوێندن بدرێت.