پێنچ یاریزان ململانێی باشترین یاریزانی ئەم وەرزەی لالیگا دەکەن

بڕیار تەها - پەیام سپۆرت 
لامین یەماڵی ئیسپانی و کیلیان مباپێی فەڕەنسی هاوشانی سێ یاریزانی دیکە کێبڕکێی باشترین یاریزانی ئەم وەرزەی لالیگا دەکەن.

 ڕێکخراوی لالیگای ئیسپانی لیستی پاڵێوراوانی بۆ خەڵاتەکانی وەرزی ٢٠٢٥/٢٠٢٦ بڵاوکردەوە، کە تێیدا پێنج ئەستێرە کێبڕکێی خەڵاتی باشترین یاریزانی وەرز دەکەن.

لەم لیستەدا لامین یەماڵی ئیسپانی لە بەرشەلۆنە و کیلیان مباپێی فەڕەنسی لە ڕیاڵ مەدرید وەک بەهێزترین پاڵێوراو دەبینرێن، هەروەها ڤیدات موریچی کۆسۆڤۆیی و پابڵۆ فۆرناڵسی ئیسپانی و نیکۆلاس پێپێی کۆتدیڤواری ناویان لە لیستەکەدا جێگیر کراوە.

ئەم ململانێیە دوای ئەوە دێت کە بەرشەلۆنە توانی نازناوەکە بباتەوە و ڕیاڵ مەدریدیش پلەی دووەمی گرت.

سەبارەت بە خەڵاتی باشترین یاریزانی لاوی خوار تەمەن ٢٣ ساڵ، فێرمین لۆپێزی لە بەرشەلۆنە و ئاردا گولەری لە ڕیاڵ مەدرید و ڤیکتۆر مونیۆزی لە ئۆساسۆنا و ئەلبێرتۆ مۆلێرۆ لە ڤیاڕیاڵ و کارلۆس ئیسپی لە لیڤانتی کێبڕکێ دەکەن.

براوەی کۆتایی کە لەرێگەی دەنگدانەوە یەکلا دەبێتەوە لە ماڵپەری فەرمی لالیگا لینک بۆ دەنگدانەکە دانراوە.