ماڵدینی هۆکاری پاشەکشەی تۆپی پێی ئیتاڵی ڕوون دەکاتەوە

پەیام سپۆرت - بڕیار تەها
پاولۆ ماڵدینی بەرگریکاری مێژووی تۆپی پێی ئیتاڵیا، هۆکاری پاشەکشە و دواکەوتنی تۆپی پێی وڵاتەکەی ڕوون دەکاتەوە.

 هەفتەی ڕابردوو هەڵبژاردەی ئیتاڵیا بەرانبەر بۆسنە شكستی هێنا و بۆ جاری سێیەمی لەسەریەک تیپەکەی نەیتوانی بگاتە مۆندیال، لە درێژەی کاردانەوەکانی ئەو شکستە، پاوڵۆ ماڵدینی قسەی خۆی دەکات و سەرەتا دەڵێت: نەگەیشتن بە یەک مۆندیال زەنگی ئاگادارکردنەوەیە. لەدەستدانی دوو دانە قەیرانە... بەڵام بێبەشبوون لە سێ مۆندیالی لەسەریەک، شکستێکی جەرگبڕ و کارەساتبارە.

ئەفسانەی بەرگریکارانی ئازۆری بەردەوام دەبێت و دەڵێت: لە سەردەمی مندا، بەهرە گرنگ بوو، بەڵام عەقڵییەت هەموو شتێک بوو. ڕێكخستن، قوربانیدان، ڕێزگرتن لە لۆگۆی سەر سنگ ئەمانە شتێک نەبوون جێگەی مشتومڕ بن یان سازشیان لەسەر بکرێت.

لە کۆتایدا پاولۆ ماڵدینی وتی: ئەمڕۆ هەمان ئاستی تینوێتی (بۆ سەرکەوتن) نابینم. یاریزانێک نابینم کە ئامادە بێت هەموو شتێک لەپێناو درێسەکەدا ببەخشێت، دۆڕانەکە بەرانبەر بۆسنە تەنیا ئەنجامێک نییە، بەڵکو ڕەنگدانەوەی کێشەیەکی قووڵترە، تیپێک بەبێ ناسنامە، بەبێ شانازی و بەبێ هەستکردن بە بەرپرسیارێتی، ئیتاڵیا چی دیکە ئیتاڵیا نییە.