فلیک: تەنیا بیر لە سەرکەوتن دەکەینەوە

پەیام سپۆڕت - دروود محەمەد

هانسی فلیکی ڕاهێنەری یانەی بەرشەلۆنە جەختی لە ئامادەیی تیپەکەی کردەوە و ڕایگەیاند، ئەوان تەنیا بیر لە سەرکەوتن دەکەنەوە.

لە کۆنگرەی بەر لە یارییەکەیان سەرەتا فلیک وتی: چامپیۆنسلیگ باشترین کێبڕکێیە لە جیهاندا، هەمووان دەجەنگن بۆ ئەوەی باشترین ئاستی خۆیان نیشان بدەن، ئێمەش ڕووبەڕووی تیپێکی زۆر بەهێز دەبینەوە کە یاریزانی کوالێتی بەرزیان هەیە، بەڵام دڵنیام کە توانای گەیشتنمان بە قۆناغی داهاتوو هەیە.

فلیک سەبارەت بە ڕکابەرەکەیان ئاماژەی بەوە کرد، ئەتلەتیکۆ تیپێکی سەختە و خاوەن عەقڵییەتێکی بەهێزە، یاریزانەکانیان خێران و لەناو یاریگادا زۆر یەکگرتوون، هەرچەندە لە یاریی ڕابردوویان پشووشیان بە چەند یاریزانێکی سەرەکیان دابوو، بەڵام هەر ئاستێکی بەرزیان پێشکەش کرد، ئەمەش نیشانەی بەهێزی ئەوانە.

لە بەردەوامی قسەکانیدا دەربارەی شێوازی یاریکردنیان، فلیک ڕوونی کردەوە، دەبێت وەستانیان لە یاریگادا زۆر ڕێکخراو بێت و پێکەوە هێرش ببەن و پێکەوەش بەرگری بکەن.

هانسی ئەوەشی خستە ڕوو، ڕاشفۆرد یاریزانێکی لێهاتووە، بەتایبەت لە ڕووبەڕووبوونەوەی تاکەکسیدا، بەڵام پێویستە لە ئەرکە بەرگرییەکانیشدا هاوکاری هاوڕێکانی بکات بۆ ئەوەی هاوسەنگی تیپەکە بپارێزێت.

لە کۆتایی قسەکانیدا هانسی فلیک دەڵێت: پێویستە تەواوی تەرکیزمان لەسەر خۆمان بێت و بە باشترین شێوە دەربکەوین، ئامانجی سەرەکی ئێمە تەنیا بردنەوە و بڕینی ئەم قۆناغەیە، چونکە یاریزانەکانم لەوپەڕی جۆش و خرۆشدان بۆ ئەم شەڕە ئەورووپییە.