فلیک بڕیاریداوە لە سێ یاریی داهاتوو ڕافینیا بپارێزێت

پەیام سپۆڕت - مەڕوان تاڵیب

هانسی فلیکی ڕاهێنەری بەرشەلۆنە پێی وایە کاتی ئەوە هاتووە پشوو بە ئەستێرە درەوشاوەکەی بدات و بیر لە دوورخستنەوەی ڕافینیا لە سێ یاریی داهاتووی یانەکە دەکاتەوە.

 لەدوای بەشداریکردنی بەردەوامی هێرشبەرە بەڕازیلییەکە لە تەواوی یارییەکانی ئەم وەرزەدا، ڕۆژنامەی سپۆڕت ئاشکرای کرد، فلیک دەیەوێت بەوپەڕی وریاییەوە مامەڵە لەگەڵ دۆخی ڕافینیادا بکات و ناوبراو لە مەترسیی تووشبوون بە پێکان بەدوور بگرێت، پلانی وایە لە یارییەکانی ڕاسینگ سانتاندێر و ئیشبیلیە پشووی پێ بدات.

ڕۆژنامە ئیسپانییەکان ئاماژەیان بەوەکرد کە درەوشانەوەی بێوێنەی ڕافینیا وایکردووە تەواوی قورسایی هێڵی پێشەوە بکەوێتە سەر شانی بەو پێیەی ئەم یاریزانە لە پێنج یاریدا وەک هێرشبەری سەرەڕم توانیویەتی 8 گۆڵ تۆمار بکات، ئەم بارگرانییە بەردەوامەش بەکارهێنانی سیستمی دەستاودەستپێکردنی یاریزانانی لە هێڵی پێشەوەی بلاوگرانا کردووەتە پێویستییەکی حەتمی.

ڕۆژنامەکە جەختی لەوە کردەوە کە پشوودان بە ڕافینیا دەرگایەکی گەورە لە بەردەم گابریێل خێسوس و بەهرەمەندی لاو حەمزە عەبدولکەریم واڵا دەکات.

لە کۆتایی زانیارییەکاندا، میدیا کەتەلۆنییەکان ئەوەیان خستەڕوو، هاندەرانی یانەی کەتەلۆنی بە پەرۆشەوە چاوەڕوانی بینینی حەمزە عەبدولکەریمن لەنێو یاریگادا دوای ئەو ئاستە بەرزەی لە قۆناغی ئامادەکاری پێش وەرز پێشکەشی کردبوو.