لاپۆرتا هەڕەشە دەکات

پەیام سپۆڕت - مەڕوان تاڵیب

خوان لاپۆرتای سەرۆکی بەرشەلۆنە ئامانجی سەرەکی ئەم وەرزیان ئاشکرا دەکات و هەڕەشەی بردنەوەی سەرجەم نازناوەکان دەکات

 لەمیانەی نوێترین چاوپێکەوتنی بۆ میدیاکان سەرۆکی بلاوگرانا وتی: ئامانجی سەرەکیمان بردنەوەی نازناوی چامپیۆنسلیگە، ئەمە جگە لەوەی ئامانجمان ئەوەیە کە بۆ سێیەم جار لەسەریەک نازناوی لالیگاش بەدەستبهێنین و هەروەها ئامانجمان بردنەوەی جامی سوپەرە بۆ ئەوەی لە ناوەڕاستی وەرزدا پەیامێکی بەهێز بنێرین کە ئێمە لێرەین بۆ ئەوەی بە جددی ڕکابەری بکەین.

لاپۆرتا ڕەتیکردەوە هیچ لێدوانێک لەسەر گلەیی و گازندەییەکانی ئەم دواییەی ڕیاڵ مەدرید سەبارەت بە ناوبژیوانان بدات و وتیشی: ئەوەی پەیوەندی بە ئێمەوە هەیە تەنیا بەرشەلۆنە و ئەو تیپە ڕکابەرەیە کە توانیومانە بنیاتی بنێن، دەستوەردان ناکەین لەو کارانەی یانەکانی دیکە دەیکەن بە مەرجێک هێڵەکانی ڕێزگرتن لە یەکتر و پەیوەندییە دامەزراوەییە ئاساییەکان نەبەزێنن.

لە کۆتایی قسەکانی لاپۆرتا ڕایگەیاند، دڵخۆش دەبێت ئەگەر یاریزانێکی یانەکە باڵۆندۆر بباتەوە، بە تایبەتی لامین یەماڵ و پێی وایە دەبوو ناوی پێدری و ڕافینیا بوونی هەبوایە و بەرشەلۆنە یانەیەکی ناوازەیە لە جیهاندا، بوونی ئەو ژمارە زۆرەی یاریزانەکانیان لە پاڵێوراوەکاندا ئەوە دەسەلمێنێت.