نوسینگه‌ی سودانی: ئه‌نجامده‌ری هێرش بۆسه‌ر پێشمه‌رگه‌ و هێزه‌كانی فه‌ڕه‌نسا ده‌ستگیركرا

په‌یام
سەرۆکوەزیرانی عێراق، محەمەد شیاع سوودانی دەستگیرکردنی ئەنجامدەرانی ئەو ھێرشەی ڕاگەیاند کە ماوەیەک لەمەوبەر لە ڕێگای ئاراستەکردنی درۆنێکەوە کرایە بنکەیەکی سەربازیی لە نزیک ھەولێر و بەھۆیەوە ئەفسەرێکی ھێزەکانی فەڕەنسا کوژرا. 

نووسینگەی ڕاگەیاندنی سەرۆکوەزیرانی عێراق لە ڕاگەیاندراوێکدا ئاماژەی بەوەداوە کە محەمەد شیاع سوودانی لە پەیوەندییەکی تەلەفۆنییدا لەگەڵ سەرکۆماری فەڕەنسا، ئیمانوێل ماکرۆن قسەی کردووە. 

لە ڕاگەیاندراوەکەدا ئەوە خراوەتەڕوو کە لە پەیوەندییە تەلەفۆنییەکەدا، سەرۆکوەزیرانی عێراق جەختی لەوە کردووەتەوە لەسەر گرنگی بەردەوامیدان بە ڕێککەوتنی ئاگربەست لەنێوان ئەمریکا و ئێران، ئەوەیش بە ئامانجی بەھێزکردنی سەقامگیری لە ناوچەکە و جیھان. 

لە ڕاگەیاندراوەکەدا ئاماژە بەوەشداوە کە لە تەوەرێکی دیکەی پەیوەندییە تەلەفۆنییەکەدا، محەمەد شیاع سوودانی پەرۆشی حکوومەتەکەی بۆ پتەوترکردنی ھاریکارییەکانی نێوان عێراق و فەڕەنسا نیشانداوە و ڕایگەیاندووە، ئەنجامدەرانی ئەو ھێرشە دەستگیرکراون کە ماوەیەک لەمەوبەر لە ڕێگای ئاراستەکردنی درۆنێکەوە کرایە بنکەیەکی سەربازیی لە نزیک ھەولێر و بەھۆیەوە ئەفسەرێکی ھێزەکانی فەڕەنسا کوژرا. 

نووسینگەی ڕاگەیاندنی سەرۆکوەزیرانی عێراق لە ڕاگەیاندراوەکەدا باسی لەوەش کردووە کە لەبەرانبەردا سەرکۆماری فەڕەنسا، ئیمانوێل ماکرۆن ستایشی ھەوڵەکانی عێراقی کردووە بۆ بەرقەرارکردنی سەقامگیری لە ناوچەکە.