سه‌رۆكی ئۆكرانیا: جه‌نگی ئێران له‌ به‌رژه‌وه‌ندی ڕووسیایه‌

سەرۆکی ئۆکرانیا، هۆشداریی توند دەدات کە جەنگ دژی ئێران خزمەت بە بەرژەوەندییەکانی ڕووسیا دەکات و توانای بەرگریی وڵاتەکەی لاواز دەکات. 
سەرۆکی ئۆکرانیا لە چاوپێکەوتنێکی تەلەفزیۆنیدا کە دوێنێ بڵاو کرایەوە، ڕەخنەی توندی لە نێردراوەکانی دۆناڵد ترەمپ گرت و جەختی کردەوە، ئەگەر نوێنەرەکانى ترەمپ بچن بۆ مۆسکۆ و نەیەن بۆ کیێڤ، ئەوە بێڕێزییە. زێلینسکی جەختی کردەوە ئەوەی بۆ ئەو گرنگە ئەنجامی گفتوگۆکانە نەک شوێنەکەی، بەڵام پشتگوێخستنی ئۆکرانیا لەم کاتە هەستیارەدا نیشانەیەکی باش نییە. 
سەبارەت بە داواکارییەکانی ڕووسیا، زێلینسکی پاشەکشەی سوپای ئۆکرانیای لە ناوچەکانی لوگانسک و دۆنێتسک ڕەت کردەوە و ڕایگەیاند: سوپاى ئۆکرانیا ناکشێتەوە چونکە چۆڵکردنی هێڵەکانى بەرگری، ورەی سوپا دەڕووخێنێت و ئۆکرانیا لە بەرانبەر هێرشەکانی دوژمندا بە تەواوی بێدەسەڵات دەکات. 
زێلینسکی جەختی لەوەش کردەوە کە جەنگ لە ئێران دەبێتە هۆی هەڵلووشینی یەدەگی وزەی ئەوروپا و لاوازکردنی هاوپەیمانەکان هەروەها واشنتن لە هاوکاریکردنی ئۆکرانیا و دابینکردنی سیستەمی بەرگریی ئاسمانی سارد دەکاتەوە. ڕاشیگەیاند: ئەمریکا نابێت تەنیا سەرنجی لەسەر ڕۆژهەڵاتی ناوەڕاست بێت، چونکە جەنگی ئێران ڕاستەوخۆ دەبێتە هۆی بەهێزبوونی مۆسکۆ و لاوازبوونی کیێڤ، هەروەها شەڕ لە ئۆکرانیا درێژ دەکاتەوە، ئەمەش مەترسییە بۆ سەر تەواوی کیشوەری ئەورووپا.