واشنتۆن بانگەشەی تێکشکاندنی شەش بەلەمی جەنگیی تاران دەکات

بەهۆی هێرشێکی هێزە ئەمریکییەکان بۆ سەر چەند بەلەمێک لە نزیک گەرووی هورمز، پێنج هاووڵاتیی مەدەنی ئێرانی گیانیان لەدەست دا، ئەمەش لە کاتێکدایە واشنتۆن بانگەشەی تێکشکاندنی شەش بەلەمی جەنگیی تاران دەکات. 
تەلەڤیزیۆنی فەرمیی ئێران لە زاری فەرماندەیەکی سەربازییەوە ڕایگەیاند، هێزە ئەمریکییەکان هێرشیان کردووەتە سەر دوو بەلەمی بچووکی مەدەنی کە کاڵایان لە وڵاتی عومانەوە بۆ ئێران دەگواستەوە، ئەو بەرپرسە جەختی کردەوە ئەو بەلەمانە هیچ پەیوەندییەکیان بە سوپای پاسدارانەوە نەبووە و تەنیا بۆ مەبەستی بازرگانی بەکارهێنراون و مەدەنی بوون، بەهۆی بۆردومانەکەی ئەمریکاشەوە پێنج کەس کە لە ناو بەلەمەکاندا بوون، گیانیان لەدەستداوە. 
ئەو زانیاریانە دوای ئەوە دێت، دوێنێ سوپای ئەمریکا و دۆناڵد ترەمپ سەرۆکی ئەمریکا ڕایانگەیاند کە هێزە دەریاییەکانیان شەش بەلەمی بچووکی ئێرانییان نوقم کردووە کە خەریکی هێرشکردن بوون بۆ سەر کەشتییە بازرگانییەکان لە گەرووی هورمزدا، ئێران هەواڵەکەى ڕەت کردەوە.