پێشبینی دەكرێت هەفتەی داهاتوو گفتوگۆی دانوستانەكانی ئیسلاماباد دەست پێبكەنەوە

پەیام

سەرۆكی ئەمریكا ڕایدەگەیەنێت: چیتر پێویست بە پڕۆژەی ئازادی بۆ گەرووی هورمز ناكات. پێشبینیش دەكرێت گەڕێكی نوێی دانوستانەكانی ئیسلامئاباد هەفتەی داهاتوو بەڕێوە بچێت.

لە لێدوانێكی ڕۆژنامەوانیدا لە كۆشكی سپی لەبارەی دۆخی ناوچەكەوە دۆناڵد ترەمپ، سەرۆكی ئەمریكا ئاماژەی بەوە كرد كە بۆ پاراستنی كەشتییە بازرگانییەكان لە گەرووی هورمز، چیتر پێویست بە بەردەوامبوونی "پڕۆژەی ئازادی" ناكات، چونكە ڕێگەی جێگرەوەی هەن، پاكستانیش داوای ڕاگرتنی پڕۆژەكەی لێ كردوون. 
ترەمپ جەختی لەوە كردەوە، كە پڕۆژەكە باش بوو، بەڵام واشنتۆن بژاردەی دیكەی لەبەردەستە و ئەگەر دۆخەكە وەك پێویست نەڕوات، دەكرێت جارێكی دیكە بە زیاتریشەوە بۆ پڕۆژەكە بگەڕێنەوە.

سەبارەت بە دانوستان، سەرۆكی ئەمریكا ڕایگەیاند كە ڕەوتی گفتوگۆكان بە باشی دەڕوات و چاوەڕوان دەكرێت بەمزووانە وەڵامی ئێران لەسەر پێشنیازی كۆتاییهێنان بە جەنگ بگاتە دەستیان و بڕیارەكانیان لەسەر بنەمای ئەو وەڵامە دەبێت.

لە بەشێكی دیكەی قسەكانیدا و جیا لە پرسی ئێران، سەرۆكی ئەمریكا خۆشحاڵیی خۆی بە سەرۆكوەزیرانی ڕاسپێردراوی عێراق نیشان دا. ڕایگەیاند: ئەوەی لە ماوەی ڕابردوودا لە عێراق ڕووی دا شتێكی زۆر باشە.

لەلایەكی دیكەوە، ڕۆژنامەی "وۆڵ ستریت جۆرناڵ" لە زاری سەرچاوە ئاگادارەكانەوە بڵاوی كردەوە "ڕەنگە هەفتەی داهاتوو گفتوگۆكانی نێوان ویلایەتە یەكگرتووەكان و ئێران لە ئیسلامئابادی پایتەختی پاكستان دەست پێبكەن، بەڵام  ئامادەكارییە سەرەتاییەكان هێشتا لە قۆناغی وتوێژدان و ئاستی نوێنەرایەتی، یان كارنامەی كۆبوونەوەكان یەكلا نەبوونەتەوە". 

لای خۆیەوە ڕۆژنامەی نیویۆرك تایمز بڵاوی كردەوە: ئەمریكا لە بەرانبەر كردنەوەی گەرووی هورمز و ڕاگرتنی پیتاندنی یۆرانیۆم پێشنیازی سووككردنی گەمارۆكانی بە ئێران داوە.