درۆنی ئۆكرانی گه‌یشته‌ مۆسكۆ و قوربانی لێ كه‌وته‌وه‌

په‌یام

هێرشێکی چڕی فڕۆکە بێفڕۆکەوانەکان بۆ سەر مۆسکۆ و دەوروبەری، کوژرانی سێ کەس و برینداربوونی ١٢ی دیکەی لێکەوتەوە، لەکاتێکدا بەرگریی ئاسمانیی ڕووسیا ڕایگەیاند دەیان درۆنیان خستووەتە خوارەوە. 
ئەمڕۆ یەکشەممە، ئەندرێ فوروبیۆف، پارێزگاری مۆسکۆ ڕایگەیاند هێزەکانی بەرگریی ئاسمانی لە کاتژمێر سێی بەرەبەیانەوە ڕووبەڕووی هێرشێکی بەرفراوانی فڕۆکە بێفڕۆکەوانەکان بوونەتەوە. بەهۆی هێرشەکانەوە ژنێک لە شارۆچکەی خیمکی و دوو پیاو لە گوندێکی سەر بە ناوچەی مەتێشچی کوژراون، جیا لەوەی زیان بە چەندین خانوو و ژێرخانی ناوچەکە گەیشتووە. 
لای خۆیەوە، سێرگی سۆبیانین، سەرۆکی شارەوانیی مۆسکۆ ئاشکرای کرد کە بەرگریی ئاسمانیی وڵاتەکەی لانی کەم ٧٤ فڕۆکەی بێفڕۆکەوانیان لە ماوەی شەودا و زیاتر لە ١٢٠ فڕۆکەی دیکەیان لە ٢٤ کاتژمێری ڕابردوودا خستووەتە خوارەوە. 
سەرۆکی شارەوانییەکە ئاماژەی بەوەش کرد، لە ناوخۆی مۆسکۆدا هێرشێکی ئاسمانی بووەتە هۆی برینداربوونی ١٢ کەس کە زۆربەیان کرێکاری پڕۆژەیەکی بنیاتنان بوون لە نێوان پاڵاوگەیەکی نەوتدا. سۆبیانین جەختی کردەوە هێرشەکە کاریگەریی لەسەر بەرهەمهێنانی پاڵاوگەکە نەبووە و تەنیا سێ باڵەخانەی نیشتەجێبوون زیانیان بەرکەوتووە. 
ئەم پەرەسەندنە سەربازییە لە کاتێکدایە، کە کۆشکی کرێملین ڕۆژی سێشەممەی ڕابردوو دەستپێکردنەوەی هێرشەکانی هێزەکانی ڕووسیای لە ئۆکرانیا ڕاگەیاند، ئەمەش دوای کۆتاییهاتنی ئاگربەستێکی سێ ڕۆژە کە لەلایەن دۆناڵد ترەمپ، سەرۆکی ئەمریکاوە ڕاگەیەندرابوو.