بەهۆی جەنگی ئێران 27 وڵات داوای پاڵپشتی دارایی لە بانكی نێودەوڵەتی دەكەن

پەیام

بەهۆی كاریگەرییەكانی جەنگی ئێرانەوە دەیان وڵات داوای پاڵپشتی دارایی لە بانكی نێودەوڵەتی دەكەن.

ئاژانسەكانی هەواڵ بڵاویان كردەوە: 27 وڵات میكانیزمی قەیرانی ناوخۆییان چالاك كردووە بۆ ئەوەی بتوانن داوای پاڵپشتی دارایی لە بانكی نێودەوڵەتی بكەن بۆ بەرەنگاربوونەوەی ئەو دەرەنجامە ئابوورییە نێودەوڵەتییەی بەهۆی كاریگەری جەنگی ئێرانەوە هاتوەتە ئاراوە.

ئاژانسی ڕۆیتەرز باسی لەوە كرد "لە سەرەتای دەستپێكردنی جەنگی ئێرانەوە تا ئێستا، 27 وڵات هەنگاویان ناوە بۆ چالاككردنی میكانیزمی قەیرانەكان كە ئەوەش وا دەكات بتوانن لە پاڵپشتی دارایی خێرا لە پرۆگرامەكانی بانكی نێودەوڵەتی سوودمەند بن".

هەر چەندە تائێستا بانكی نێودەوڵەتی ناوی ئەو وڵاتانە و كۆی پارەی داواكراوی ئاشكرا نەكردووە، بەڵام بەرپرسانی كینیا و عێراق ڕایانگەیاندووە، كە  بۆ زاڵبوون بەسەر دەرەنجامەكانی جەنگی ئێران وەك بەرزبوونەوەی بەرچاوی نرخی سووتەمەنی و كەمبوونەوەی توندی داهاتی نەوتی داوای پاڵپشتی دارایی خێرا لە بانكی نێودەوڵەتی دەكەن.

جەنگی ئێران و داخستنی گەرووی هورمز ڕەنگدانەوەی لەسەر كەمبوونەوەی ئاستی هەناردەكردنی نەوت هەبووە و نرخی سووتەمەنی و كەلوپەلە پیشەسازییەكان لە زۆرینەی وڵاتان گران بووە.