کریستیانۆ بۆ مۆندیال هەڕەشە دەکات

بڕیار تەها - پەیام سپۆرت

کریستیانۆ ڕۆناڵدۆی کاپتنی هەڵبژاردەی پۆرتوگالی، پێش دەستپێکردنی یارییەکانی مۆندیالی ٢٠٢٦ پەیامێکی پڕ لە ئاڵنگاری و هەڕەشە ئاراستەی هەمووان دەکات.

 ڕۆناڵدۆ لە لێدوانێکدا بۆ تۆڕی "Sport TV"ـی پۆرتوگالی وتی: "گرنگترین شت دەستپێکردنی یەکەم یاریمانە لە 17ـی ئەم مانگەدا، پاشان لە یاریی دووەم و سێیەمدا، کاتێک بارودۆخەکە قورستر دەبێت و ماندوێتیی جەستەیی و دەروونی کەڵەکە دەبێت و پلەکانی گەرما بەرز دەبنەوە، ئەو کاتە دەبینین کێ پاڵەوانی ڕاستەقینەیە."

کاپتنەکەی پۆرتوگالی وتیشی: "پێموایە دەتوانین لە ڕیزی پاڵەوانەکاندا بین، بەڵام وەک پێشتریش وتم؛ ئەمە بەستراوەتەوە بە چەندین هۆکارێکی جیاوازەوە، من زۆر گەشبینم و متمانەم هەیە کە کارەکان بە باشی دەڕۆن و مۆندیالێکی سەرکەوتوو بەڕێ دەکەین."

ڕۆناڵدۆ جەختی کردەوە و دەڵێت: "گرنگترین شت سەرەتایەکی بەهێزە؛ بردنەوە لە یاریی یەکەم، پاشان دووەم و سێیەم بۆ ئەوەی ببینە پێشەنگی کۆمەڵەکە، نابێت وا بچینە ناو پاڵەوانێتییەکەوە کە پێمان وابێت بردوومانەتەوە، بەڵکو دەبێت هەنگاو بە هەنگاو و بە هێمنی بڕۆینە پێشەوە."

بڕیارە شەوی چوارشەممەی داهاتوو، ڕۆناڵدۆ و هاوڕێکانی لە یەکەم یاریی خۆیاندا لە قۆناغی کۆمەڵەکاندا، ڕووبەڕووی هەڵبژاردەی کۆنگۆ ببنەوە و دواتر بەرانبەر ئۆزبەکستان، کۆڵۆمبیاش یاریی دەکەن.