3 کاتژمێر پێش ئێستا
125 جار خوێنراوەتەوە
ئەمریكا.. ڤایرۆسێكی نوێ ڕووبەڕووى كەشتییەكی گەشتیاریی دەبێتەوە
پەیام
دوای هانتا، ڤایرۆسێكی دیكە بەرۆكی كەشتییەكی گەشتیاریی لە كەناراوەكانی ئەمریكا دەگرێت و تا ئێشتا 125 كەس تووشی بوون.
سەنتەری كۆنتڕۆڵكردن و خۆپارێزی لە نەخۆشییەكان (CDC) ئاشكرای كرد، ڤایرۆسی "نۆرۆڤایرۆس" لەناو كەشتیی گەشتیاری "ڕوبی پرینسێس" بڵاوبووەتەوە و لە كۆی سەرجەم گەشتیار و تیمی كەشتییەكە، 125 كەس تووشی نیشانەكانی سكچوون و ڕشانەوەی توند بوون.
كەشتییەكە لە گەشتێكی نێوان سان فرانسیسكۆ و ئالاسكا بووە و لە سەرەتای ئەم مانگەدا گەڕایەوە. بەپێی ڕاپۆرتە تەندروستییەكان، ڤایرۆسەكە زۆر بەخێرایی لە ڕێگەی خواردن یان ئاوی پیس و دەستلێدانی ڕووە پیسەكانەوە دەگوازرێتەوە.
كۆمپانیای خاوەن كەشتییەكە ڕایگەیاند، تووشبووەكان كەرەنتینە كراون و ڕێكاری توندی پاكژكردنەوەیان گرتووەتەبەر، پزیشكان جەخت دەكەنەوە، كە شوشتنی دەست بە ئاو و سابوون گرنگترین ڕێگەی خۆپارێزییە، چونكە پاكژكەرەوەكانی دەست (جێڵ) بە تەنیا دژی ئەم ڤایرۆسە كارا نین.
ئەم بڵاوبوونەوەیە دوای تۆماركردنی حاڵەتەكانی ڤایرۆسی "هانتا" دێت، كە نیگەرانیی لای دەسەڵاتە تەندروستییەكانی ئەمریكا دروست كردووە و داوا لە گەشتیاران دەكرێت لەكاتی دەركەوتنی نیشانەكاندا دەستبەجێ ناوەندە پزیشكییەكان ئاگادار بكەنەوە.
لە تۆڕە کۆمەڵایەتیەکان شەیری بکە