به‌ریتانیا: هێرشه‌كانی ئێران بۆسه‌ر وڵاتانی كه‌نداو پێشێلكاری نێوده‌وڵه‌تین

په‌یام
وەزیری کاروباری ڕۆژهەڵاتی ناوەڕاستی بەریتانیا ڕایگەیاند، هێرشەکانی ئێران لە کەنداو پێشێلکاریی یاسای نێودەوڵەتین و هۆشداریش دەدات کە داخستنی گەرووی هورمز دەبێتە هۆی زیادبوونی برسێتی و هەژاری. 
ئەو بەرپرسە بەریتانییە ئاماژەی پێ کرد کە هێرشەکانی ئێران بۆ سەر هاوبەشەکانی وڵاتەکەی لە ناوچەی کەنداو، بەتایبەتی ئەو هێرشانەی لە ئاوەکانی عومان ئەنجام دراون، پەرەسەندنێکی مەترسیدار و پێشێلکارییەکی زەقی یاسا نێودەوڵەتییەکانن. جەختیشی لەوە کردەوە کە لە ئێستادا ئەرکی لەپێشینە دەستەبەرکردنی ئازادیی هاتوچۆی کەشتییەکانە لە گەرووی هورمز بەبێ بوونی هیچ جۆرە هەڕەشەیەک. 
سەبارەت بە لێکەوتەکانی ئەو گرژییانە، وەزیرەکە ڕوونی کردەوە کە ئەو فشارە ئابوورییەی بەهۆی بەردەوامیی داخستنی گەرووی هورمزەوە دروست دەبێت، زیانێکی قورس بە ژیانی خەڵک دەگەیەنێت. ئەو پێی وایە ئەم دۆخە پاڵ بەو کەسانەوە دەنێت کە لە بارودۆخێکی لاوازدان بەرەو قەیرانی قووڵتری برسێتی و هەژاری. 
لە کۆتاییدا، دووپاتی کردەوە لەندەن بەردەوام دەبێت لە خستنەڕووی هەڵوێستەکانی خۆی بە شێوەیەکی ڕاستەوخۆ و ڕاشکاوانە بە نوێنەرانی ئێران و لایەنە پەیوەندیدارەکانی تر. هاوکات هیوای خواست کە هەوڵە دیپلۆماسییەکان سەرکەوتن بەدەست بهێنن و دۆخەکە بگەڕێتەوە بۆ قۆناغی ئاگربەست.