رێباز حەملان: مەسرور بارزانی توانیویەتی بەرەنگاری هەموو پیلان و قەیرانەکان ببێتەوە

پەیام 

رێباز حه‌ملان یاریده‌ده‌ری سه‌رۆك وه‌زیرانی ماوەبەسەرچووى هه‌رێم له‌په‌یامێكدا دەڵێت "مەسرور بارزانی توانیویەتی بەرەنگاری هەموو ئەو پیلان و قەیرانانە ببێتەوە  کە ڕووبەڕووى هەرێم بوونەتەوە".

پەیامەکەى رێباز حه‌ملان به‌بۆنه‌ی حه‌وت ساڵ به‌سه‌ر وه‌رگرتنی ده‌ستبه‌كاربوونی كابینه‌ی نۆیه‌می حكومه‌تی هه‌رێمەوەیە و دەشڵێت ""مه‌سرور بارزانی زۆر پلانی له‌ گۆڕنا و زۆری تریش كه‌ له‌ ئێستادا خه‌ریكن له‌گۆڕ ده‌نێت، نه‌یارانی به‌ چۆكدا دێن له‌به‌رده‌میدا".

رێباز حەملان ئاماژەی بەوەشکردووە، "مەسروور بارزانى لە پەروەردەی رێبازی بارزانیدا خۆڕاگری و ئازایەتی و فیداکاری سەلماندووە و سەرکردەی کردارە و خاوەن گفتە، ژمارەکانیش گەواهی ئەوە دەدەن کە چاکسازییەکان لە قۆناغێکی پێشکەوتوودان".
 
ئەمە لە کاتێکدایە لە دواى دەستبەکاربوونى کابینەى نۆیەمى حکومەتى هەرێم بە سەرۆکایەتیی مەسرور بارزانى لە ساڵى 2019ەوە تائێستا 13 مووچە بە تەواوى دابەشنەکراوە، کە بریتین لە حەوت مووچەى 2020، سێ مووچەى 2023، یەک مووچەى 2024، دوو مووچەى 2025.