سعوودیە هۆشداری لە هێرشی گرووپە چەكدارەكانی عێراقیش دەدات

پەیام 

هاوكات لەگەڵ هێرشی حوسییەكانی یەمەن، سعوودیە لە ئامادەباشیدایە بۆ بەرپەرچدانەوەی هێرشی گرووپە چەكدارە عێراقییەكانیش.

بەرپرسێكی سعوودی ڕایگەیاند، زانیارییە هەواڵگرییەكانی وڵاتەكەی و ئەمریكا ئاماژە بەوە دەكەن كە گرووپە چەكدارەكانی عێراق و حوسییەكان بە سەرپەرشتی سوپای پاسدارانی ئێران، سەرقاڵی هەماهەنگین بۆ ئەنجامدانی هێرشی كتوپڕ بۆ سەر سعوودیە. 

هێرشە ئەگەرییەكان ژێرخانە مەدەنی و ئابوورییەكان، لەوانەش دامەزراوەكانی وزە، فڕۆكەخانە و بەندەرەكان دەكەنە ئامانج.

بە وتەی ئەو بەرپرسە، جووڵەی فڕۆكەی بێفڕۆكەوان و مووشەك لە باكوور و باشووری شانشینەكە بینراوە، كە ئەمەش مەترسییەكی گەورە بۆ سەر ناوچەكە دروست دەكات. 

هاوكات جەخت لەسەر ئاستی بەرزی هەماهەنگی سەربازی لەگەڵ فەرماندەیی ناوەندی ئەمریكا (سێنتكۆم) كراوەتەوە. 

سعوودیە ڕایگەیاندووە كە تەواوی ڕێكارە پێویستەكان دەگرنە بەر بۆ بەرپەرچدانەوەی هەر هێرشێك كە بكرێتە سەر خاكەكەی، جەختیشیان لەوە كردووەتەوە كە پەیوەندییەكان لەگەڵ تاران و لایەنەكانی دیكە بۆ هێوركردنەوەی دۆخەكە بەردەوامە.