هاتووچۆی تانكەرە نەوتەكان لە گەرووی هورمز کەمیکرد و لە بابولمەندەب زیادیكرد

پەیام 

ئاستی هاتووچۆی تانكەرەكانی نەوت لە گەرووی هورمز دابەزی و جووڵەی كەشتییەكان لە گەرووی بابولمەندەب زیادی كرد.

كۆمپانیای "كێپلەر" بۆ شوێنكەوتنی جووڵەی كەشتییەكان ڕایگەیاند، ئەم هەفتەیە ئاستی هاتووچۆی تانكەرەكانی نەوتی خاو لە گەرووی هورمز بە شێوەیەكی بەرچاو دابەزیوە، بەپێی ئامارەكان، تەنیا 6 تانكەر گەرووەكەیان جێهێشتووە، 21 كەشتیش چوونەتە ناو گەرووەكە كە زۆربەیان ڕێڕەوی ئێرانییان بەكارهێناوە.

لە بەرامبەردا، گەرووی بابولمەندەب بوژانەوەیەكی بەرچاوی بەخۆوە بینیوە، ڕۆژی پێنجشەممە 26 كەشتی تێپەڕیون، لە كاتێكدا ڕۆژی پێشتر تەنیا 7 كەشتی بوون. 

ئەم گۆڕانكارییانە لە كاتێكدایە كە بەهۆی گرژییە ئەمنییەكانی ناوچەكەوە، كۆمپانیاكانی گواستنەوە و دڵنیایی بە وریاییەوە مامەڵە دەكەن و بەشێكیان گەشتەكانیان دواخستووە یان ڕێڕەوەكەیان گۆڕیوە.

گەرووی هورمز بە یەكێك لە گرنگترین شاڕێگەكانی وزەی جیهان دادەنرێت، چونكە لە بارودۆخی ئاساییدا پێنج یەكی نەوتی جیهان لە ڕێگەی دەریاوە بەو گەرووەدا تێپەڕ دەبێت. ئێستا بەهۆی تێكچوونی دۆخی ئەمنییەوە، هێڵەكانی گواستنەوەی وزە لە ناوچەكەدا كەوتوونەتە ژێر كاریگەریی ئەو ئاڵۆزییانەوە.