لەکاتى نەشتەرگەرییەکدا لە یابان بومەلەرزەیەک ڕوویداو پزیشکەکان نەخۆشەکە جێناهێڵن

پەیام

لە گرتەیەكی ڤیدیۆییدا تیمێكی پزیشكیی وڵاتی یابان دەردەكەون كە لەو كاتەی بومەلەرزەیەكی بەهێز ڕوو دەدات ئەوان سەرگەرمی ئەنجامدانی نەشتەرگەرییەكن و شوێنی خۆیان جێ ناهێڵن و دوای بوومەلەزەكە دەست بە نەشتەرگەرییەكە دەكەنەوە.

بەپێی ئەم گرتە ڤیدیۆیە كە لە ڕێی كامێرای چاودێریی هۆڵی نەشتەگەریی نەخۆشخانەی گشتیی پارێزگای (كۆما مۆتۆ)ی باشووری ڕۆژاوای یابان تۆمار كراوە، لەو كاتەی تیمێكی پزیشك و یاریدەدەرانی سەرگەرمی نەشتەرگەرییەكن بۆ نەخۆشێك بوومەلەرزەیەك بە گوڕی 6.8 بە پلەی ڕێختەر، ڕوو دەدات.

لە ڤیدیۆكەدا كە دەستەی پەخشی یابان بڵاوی كردەوە، دەردەكەوێت "ژووری نەشتەرگەرییەكە بە تەواوی كەلوپەلەكانیەوە بەتوندی و هاوشێوەی جۆلانە دەكەوێتە جووڵە، بەڵام لە ڕەفتارێكی مرۆیی و پیشەییانەیاندا، پزیشك و تیمی نەشتەرگەرییەكەی هەوڵی پاراستنی نەخۆشەكە و سەقامگیریی دەدەن و پاش هێوربوونەوەی دۆخەكەش درێژە بە كارەكەیان دەدەن و نەشتەرگەرییەكەش سەركەوتوو دەبێت".

بەپێی زانیاریی دەستەكە، لەو كاتەدا چوار نەشتەرگەریی لەو نەخۆشخانەیەدا ئەنجام دراوە.

ئەو بوومەلەرزەیە 28ی مانگی ڕابردوو ڕووی دا و بەهۆیەوە لانی كەم 39 كەس گیانیان لەدەست دا و هەزاران خانووش زیانیان بەر كەوت و هەزاران كەسیش تائێستا لە ناوەندەكانی داڵدەدانی حكومییدا دەژین.