پلانی کوشتنی مێسی و کریستیانۆ لە کاتی مۆندیال ئاشکرا دەبێت

پەیام سپۆڕت - مەڕوان تاڵیب

لیۆنێل مێسی ئەرجەنتینی لە کاتی بەڕێوەچوونی یارییەکانی مۆندیالی 206دا، زۆرترین هەڕەشەی ئاراستە کراوە، لەوانەش هەڕەشەی ئەنجامدانی هێرشی خۆکوژی.

 ڕاپۆرتێکی پۆلیسی ئەمریکا ئاشکرای کردووە کە پێش یاری قۆناغی کۆمەڵەکانی ئەرجەنتین بەرانبەر ئوردن، کەسێک پەیوەندی بە فڕۆکەخانەی دالاسەوە کردووە و هەڕەشەی ئەوەی کردووە کە لەگەڵ دوو کەسی دیکەدا بە چەک و تەقەمەنی دەستکردەوە دەچێتە ناو یاریگاوە و بە تایبەتی مێسی وەک ئامانجی سەرەکی خۆیان دەستنیشان کردووە.

ئەم جۆرە هەڕەشانە تەنیا لەو یارییەدا نەبوون، بەڵکو پێش یاری قۆناغی 16ـی ئەرجەنتین دژی هەڵبژاردەی میسر، هەڕەشەی هاوشێوە دووبارە بوونەتەوە، پۆلیسی ناوچەکە پەیوەندییەکی تەلەفۆنی پێگەیشتووە کە تێیدا بانگەشەی ئەوە کراوە بۆمب لەناو تەنەکەی خۆڵەکانی یاریگاکەدا چێنراوە.

دوای ئەم پێشهاتە، هێزە ئەمنییەکان بە هاوکاری سەگی پۆلیسی تایبەت بە دۆزینەوەی تەقەمەنی، پشکنینێکی وردیان بۆ ناوەوە و دەرەوەی یاریگاکە ئەنجامدا، دوای گەڕان و بەدواداچوونێکی توند، دەرکەوت کە هیچ بۆمبێک لەو شوێنەدا نییە و ئاگادارکردنەوەکە ناڕاست بووە.

هاوکات، کریستیانۆ ڕۆناڵدۆش ڕووبەڕووی کێشەی ئەمنی بووەتەوە لە هۆتێلی مانەوەی هەڵبژاردەی پورتوگال لە هیوستن،  پیاوێکی گومانلێکراو زانیاری وردی لەسەر شوێنی مانەوەی ڕۆناڵدۆ ویستووە، کە دوای دوو ڕۆژ پۆلیس لە ناو هۆتێلەکەدا دەستگیری کرد، لە تۆرۆنتۆش پیاوێکی دیکە دەستگیرکرا کاتێک هەوڵیدا لەگەڵ ڕۆناڵدۆ بچێتە ناو بەرزکەرەوەیەکەوە (ئەسانسۆر) و دواتر لە کاتی لێکۆڵینەوەدا ڕایگەیاند کە تەنیا ویستوویەتی وێنەیەکی سێڵفی لەگەڵدا بگرێت.