ڕێبەری ئێران داوای یەكڕیزیی لە دەسەڵاتدارانی جیهانی ئیسلام دەكات

پەیام

ڕێبەری ئێران داوای یەكڕیزی لە دەسەڵاتدارانی جیهانی ئیسلامی بۆ گەیشتن بە شارستانییەتی ئیسلامی دەكات و ڕایشیدەگەیەنێت: لە ئێستادا ئێران لە هەر كاتێك زیاتر لە سەركەوتنەوە نزیكە.

سەید موجتەبا حسێنی خامنەیی لە پەیامێكدا بەبۆنەی "هەفتەی یەكڕیزی" و یادی لەدایكبوونی پێغەمبەری ئیسلام (د.خ)، پەیامێكی بڵاو كردەوە و تێیدا جەختی لە پێویستی یەكگرتوویی ئومەتی ئیسلامی كردەوە و وتیشی: لە ئێستادا ئێران لە هەر كاتێك زیاتر لە جەنگی ئەمریكا و قەوارەی ئیسرائیل لە سەركەوتنەوە نزیكترە. 

ڕێبەری ئێران ڕایگەیاند: دوژمنانی ئیسلام، بەتایبەت ئەمریكا و ڕژێمی زایۆنی، هەوڵ دەدەن لە ڕێگەی زەقكردنەوەی جیاوازییە مەزهەبی، ڕەگەزی، سیاسی و جوگرافییەكانەوە دووبەرەكی لە نێوان موسڵمانان دروست بكەن و دەسەڵاتی خۆیان بسەپێنن.

ڕێبەر ئاماژەی بەوەش كرد "هەر كارێكی دووبەرەكی ئامێز لەلایەن هەر كەسێكەوە بێت، خزمەتكردنە بە پیلانی دوژمن". داواشی لە دەسەڵاتدارانی وڵاتانی ئیسلامی و ناوچەكە كرد دوژمنی ڕاستەقینەی خۆیان بناسن و بۆ پاراستنی بەرژەوەندییەكانیان و بەرگریكردن لە گەلی ستەملێكراوی فەڵەستین لەجیاتی ناكۆكی، ڕوو لە هاوكاری و یەكگرتوویی بكەن. 

لە كۆتاییدا، ڕێبەری باڵای ئێران ڕایگەیاند: یەكڕیزی بەردی بناغەی گەیشتنە بە شارستانێتی نوێی ئیسلامی و پێویستە گەلی ئێرانیش ڕێگە بە هیچ جۆرە ناكۆكییەك نەدەن.