جولیان ئالڤارێز بڕیاری کۆتایی دا

پەیام سپۆڕت - مەڕوان تاڵیب

جولیان ئالڤارێزی ئەرجەنتینی بڕیاری داوە تاوەکو بازاڕی گواستنەوەی زستانەی داهاتوو لەگەڵ ئەتلەتیکۆ مەدرید بەردەوام بێت، ئەمەش دوای ئەوەی هەوڵەکانی بۆ چوونە بەرشەلۆنە لەم هاوینەدا بەهۆی ڕەتکردنەوەی توندی یانەکەیەوە سەری نەگرت.

 بەپێی زانیارییەکانی ڕۆژنامەی "سپۆرت"، ئالڤارێز بە فەرمی ماتیو ئەلیمانی، بەڕێوەبەری وەرزشی ئەتلەتیکۆی لە بڕیاری مانەوەی ئاگادار کردووەتەوە، سەرەڕای ئەوەی چەندین ئۆفەری گەورەی لە لایەن یانەکانی وەک ئارسیناڵەوە بۆ هاتبوو.

ئالڤارێز کە پێشتر لە مۆندیالدا ڕایگەیاندبوو دەیەوێت خەونەکەی لە بلاوگرانا بەدی بهێنێت، ڕووبەڕووی ڕەتکردنەوەی توندی جێڵ مارین، خاوەن پشکە سەرەکییەکەی ئەتلەتیکۆ بووەوە کە سوور بوو لەسەر نەفرۆشتنی بە ڕکابەرە ڕاستەوخۆکەیان و کارگێڕی ئەتلەتیکۆ هەوڵی زۆریان دا یاریزانەکە ڕازی بکەن بچێتە خولی ئینگلیزی تاوەکو لە کێشە و بێزارییەکانی ناو تیپەکە ڕزگاریان بێت، بەڵام هێرشبەرە ئەرجەنتینییەکە بژاردەی مانەوەی هەڵبژارد و نەیویست ڕوو لە هیچ یانەیەکی تر بکات.

بەم شێوەیە، جولیان ئالڤارێز لانیکەم تا مانگی یەکی ساڵ داهاتوو داهاتوو لە مەدرید دەمێنێتەوە و لە ژێر سەرپەرشتی سیمۆنی یاری دەکات و ڕەتکردنەوەی ئۆفەرەکانی دیکە نیشانەی ئەوەیە کە ئەو هێشتا ئومێدی بە پەیوەندیکردن بە بەرشەلۆنە ماوە و چاوەڕێی دەرفەتێکی تر دەکات لە بازاڕی گواستنەوەی زستانەدا.