04/09/2026
344 جار خوێنراوەتەوە
ئێران: ئەمریكا هێرشى وشکانى بكات لە هەفتەیەکدا 1000 سەرباز بەدیل دەگرین
پەیام
سەركردەیەكی باڵای ئێران ڕایدەگەیەنێت، ئەگەر ئەمریكا هێرش بكات، تەنیا لە هەفتەی یەكەمدا هەزار سەربازی ئەمریكی بە دیل دەگرن، و ئەمریكاش ناچارە مل بۆ ڕێككەوتن بدات.
موحسین ڕەزایی، ئەمینداری ئەنجوومەنی باڵای ئاسایشی نیشتمانیی ئێران، لە لێدوانێكدا كە (بەغداد ئەلیەوم) گواستوویەتیەوە، ئاشكرای كرد كە ئەمریكییەكان ئێستا لە خولەكەكانی كۆتاییدان و لەژێر فشارێكی زۆر سەختدان، بۆیە درێژكردنەوەی دانوستانەكان شتێكی ئاساییە.
لە بەشێكی دیكەی قسەكانیدا، ڕەزایی باسی لەوە كرد كە ئەگەر دانوستانەكان بۆ چەند ڕۆژێكیش درێژ بكرێنەوە، هیچ شتێكی سەیر ڕوونادات. وتیشی: "سەرجەم دەرگاكان بەڕووی ئەمریكییەكاندا داخراون، بۆیە هیچ بژاردەیەكیان لەبەردەستدا نییە جگە لە ڕێككەوتن لەگەڵ تاران. "
لە بەرانبەر هەڕەشە سەربازییەكانی واشنتۆنیشدا، ئەمینداری ئەنجوومەنی ئاسایشی نیشتمانی بە گاڵتەپێكردنەوە ڕایگەیاند كە ئەمریكا توانای هیچ هێرشێكی بۆ سەر ئێران نییە و ناتوانێت سزاكانیش قورستر بكات.
موحسین رەزایی جەختی كردەوە كە تاران بەپێی توانا و هێزەكانی خۆی وەڵامی هەر دەستدرێژییەك دەداتەوە، ئەو قسانەشی بە پەیامێكی ڕوون ناو برد كە ئەمریكا لە گۆڕەپانەكەدا لاواز بووە و ناتوانێت هیچ هەنگاوێكی كرداری دژی ئێران بنێت.
ئەو بەرپرسە باڵایەی ئێران راشیگەیاند: ئەگەر ئەمریكا هێرشی وشكانی بكات، تەنیا لە هەفتەی یەكەمدا هەزار سەربازی ئەمریكی بەدیل دەگرن.
لە تۆڕە کۆمەڵایەتیەکان شەیری بکە