بچووكترین وڵات ڕێگری لە دەركردنی ڕاگەیەنراوێك دژی چین کرد

پەیام 

بچووكترین وڵاتی جیهان توانیی ڕێگری لە دەركردنی ڕاگەیەنراوێكی توند بكات دژی تاقیكردنەوە مووشەكییەكانی چین.

لە كۆتایی لووتكە ساڵانەكەی وڵاتانی زەریای هێمن كە شەش ڕۆژی خایاند و لە وڵاتی پاڵاو بەڕێوەچوو، سەركردەكان نەیانتوانی بە كۆدەنگ سەركۆنەی هاویشتنی مووشەكێكی بالیستیی چین لەو ناوچەیە بكەن، بەڵكو تەنیا بە دەربڕینی "نیگەرانی" كۆتاییان پێ هێنا. 

هۆكاری ئەم پاشەكشەیە بۆ ڕەتكردنەوەی وڵاتی "ناورۆ" دەگەڕێتەوە كە دژی وشەكانی ڕاگەیەنراوەكە وەستایەوە. ئەم هەڵوێستەش وەك نیشانەیەك بۆ نزیكبوونەوەی زیاتری ئەو وڵاتە بچووكە لە پەكین سەیر دەكرێت. 

لەلایەكی دیكەوە، كریستۆڤەر لوكسۆن، سەرۆكوەزیرانی نیوزلەندا، هەوڵی دا گرنگیی هەڵوێستەكەی ناورۆ كەم بكاتەوە. ئەو ڕایگەیاند كە ئەوە نابێتە ڕێگر لەبەردەم ئەوەی وڵاتانی دیكە هەڵوێستی ڕوونی خۆیان بەرانبەر مەترسییە ئەمنییەكان دەرببڕن. 

بەرپرسانی لوتكەكە دەڵێن، دەركردنی ڕاگەیەنراوەكانی ئەم ڕێكخراوە پێویستیان بە كۆدەنگیی هەمووانە، بۆیە ئەم ڕێگرییەی ناورۆ بە ئاماژەیەكی مەترسیدار ناو دەبەن كە دەریدەخات هەژموونی چین تا چەند قووڵ بووەتەوە لەناو بڕیارە سیاسییەكانی ئەو ناوچەیەدا. 

ناورۆ دوورگەیەكی بچووكە لە باشووری زەریای هێمن، بچووكترین كۆماری جیهان و سێیەم بچووكترین دەوڵەتە لە ڕووی ڕووبەرەوە، پانتاییەكەی تەنیا 21 كیلۆمەتری چوارگۆشەیە و ژمارەی دانیشتووانەكەشی كەمترە لە 12 هەزار كەس. پایتەختی نییە بەڵام حكومەت و پەرلەمانی هەیە و لە ساڵی 1968 ـەوە سەربەخۆیی وەرگرتووە و لەژێر هەژموونی ئوستوورالیا و نیوزلەندا و بەریتانیا نەماوە.