"رێگە نادەین خاكی عێراق بۆ هەڕەشەکردن لە دراوسێکانمان بەکاربهێنرێت"

پەیام

هەیبەت حەلبووسی سەرۆکی ئەنجوومەنی نوێنەرانی عێراق، ئیدانەی ئەو هێرشانەی کرد، كە کرانە سەر سعوودیە و جەختی کردەوە، "رێگە نادەین خاكی عێراق بۆ هەڕەشەکردن لە دراوسێکانمان بەکاربهێنرێت"

ئەمرۆ 12ی 9ی 2026 لە بەیاننامەیەکدا، حەلبووسی راشیگەیاند: "بەکارهێنانی خاکی عێراق یان ئاسمانەکەی بۆ هەڕەشەکردن لە ئاسایشی سعوودیەی برا یان هەر وڵاتێکی دیکەی دراوسێ، کارێکی رەتکراوە و سەرکۆنەکراوە، ئەم جۆرە کردەوانە بە تەواوی پێچەوانەی سیاسەتی فەرمیی عێراقە".

لە بەشێکی دیکەی هەواڵەکەدا، سەرۆکی ئەنجوومەنی نوێنەران هۆشداری دا لە مەترسییەکانی پەلکێشکردنی عێراق بۆ ناو ململانێ هەرێمییەکان. لەو چوارچێوەیەشدا گرنگیی هێشتنەوەی چەکی تەنیا لە دەستی دەوڵەت و دامەزراوە دەستوورییەکاندا دووپات کردەوە، دەبێت لەژێر فەرمانی راستەوخۆی فەرماندەی گشتیی هێزە چەکدارەکاندا بێت، ئەمەش وەک هەنگاوێک بۆ بەهێزکردنی سەروەریی دەوڵەت و پاراستنی ئاسایش و سەقامگیریی وڵات.

سەبارەت بە هەنگاوەکانی حکوومەتیش بۆ مامەڵەکردن لەگەڵ دۆخەکە، حەلبووسی پشتیوانیی تەواوی خۆی بۆ ڕێکارەکانی حکومەتی عێراق دەربڕی، بەتایبەتی بڕیاری دەستپێکردنی لێکۆڵینەوەیەکی بەپەلە بۆ ئاشکراکردنی ئەو لایەنانەی لەم هێرشانەدا تێوەگلاون و رووبەڕووکردنەوەیان بە یاسا.

لەدوای هێرشكردنە سەر سعودیە لە خاكی عێراقەوە، حكومەت بە فەرمی دەستی بە لێكۆڵینەوە كرد و فەرماندەیەكی ئەمنیشی لە پۆستەكەی دووردەخستەوە.