گرووپە چەكدارەكانی عێراق تێوەگلانیان لە هێرشكردنەسەر سعودیە ڕەتكردەوە

پەیام

گرووپە چەكدارەكانی عێراق تێوەگلانیان لە هێرشكردنەسەر سعودیە ڕەت دەكەنەوە و ئامادەییشیان بۆ لێكۆڵینەوە دەربڕی.

لە ڕاگەیەنراوێكدا، گرووپە چەكدارەكانی دەرەوەی دەسەڵاتی حكومەت لە عێراق، تێوەگلانی خۆیان لە هێرشكردنە سەر وێستگە و دامەزراوەكانی وزەی سعودیە بە توندی ڕەت كردەوە و جەختیان كردەوە كە هەر چەندە ئەو كارە "شانازییەكە، بەڵام ئەوان بانگەشەی بۆ ناكەن". 

گرووپە چەكدارەكان سەرسووڕمانی خۆیان بەرانبەر بە خێرایی حكومەتی عێراق لە قبوڵكردنی ئەو تۆمەتانەدا دەربڕی، بە بێ ئەوەی پشت بە بەڵگەی باوەڕپێكراو، یان لێكۆڵینەوەی شیاو ببەستن. 

هەروەها ئاماژەیان بەوە دا كە دووبارەكردنەوەی تۆمەتەكان تەنها هەوڵێكی شكستخواردووە بۆ داپۆشینی شكستەكانی سعودیە لە بەرانبەر گەلی یەمەندا.

 لە لایەكی دیكەوە، گرووپە چەكدارەكان هەڵوێستی نەگۆڕی خۆیان لە پشتگیریكردنی گەلی یەمەن دووپات كردەوە و هۆشدارییان دا لە تێوەگلاندنی عێراق لە قەیرانەكاندا كە تەنها خزمەت بە نەیارەكان دەكات.

 لە كۆتایی ڕاگەیەنراوەكەدا، ئەو گرووپانە ئامادەیی تەواوی خۆیان بۆ بەشداری لە هەر لیژنەیەكی لێكۆڵینەوەی حكومی بۆ دەرخستەی ڕاستییەكان نیشان دا.