بەخشین: نووسینگەكانمان بۆ وەرگرتنی هاوكارییەكانتان بۆ زیانلێكەوتووانی لافاوەكەی هەولێر ئامادەن

پەیام

دەزگای خێرخوازیی بەخشین هەڵمەتێكی بەپەلەی مرۆیی بۆ زیانلێكەوتووانی لافاوەكەی شاری هەولێر ڕاگەیاند.
شەوی ڕابردوو، دوابەدوای ئەو باران و لافاوە بەهێزەی شاری هەولێری گرتەوە، دەزگای خێرخوازیی بەخشین ڕاگەیەنراوێكی بڵاوكردەوە و تێیدا هەڵمەتێكی بەپەلەی مرۆیی بۆ فریاكەوتنی لێقەوماوان ڕاگەیاند.

لە ڕاگەیەنراوەكەدا، بەخشین ئاماژە بە لافاوەكەی شاری هەولێر و ڕووبەڕووبوونەوەی هاووڵاتیان بە زیانی ماددی دەكات و ڕایدەگەیەنێت: ئەركی ئیمانی و مرۆییمانە لێقەوماوان تەنیا جێ نەهێڵین.
دەزگای خێرخوازیی بەخشین ڕایدەگەیەنێت: داواتان لێ دەكەین وەك هەمیشە بە دەستی ئاوەدان و دڵی بەخشندەتانەوە بەدەنگ ئەم هەڵمەتەی دەزگای بەخشینەوە بێن.

بەخشین ڕایشیگەیاند: نووسینگەكانمان لە سەرانسەری هەرێمی كوردستان لە دەرەوەی وڵاتیش بۆ وەرگرتنی كۆمەك و هاوكارییەكانتان ئامادەن.
ئەمەو ساڵی ڕابردووش دەزگای خێرخوازیی بەخشین لە ڕووداوی لافاوی شارۆچكەی چەمچەماڵ ڕۆڵی سەرەكی لە بەهاناوەچوونی زیانلێكەوتووانی ناوچەكەدا بینی.