بەهۆى ناردنى خەڵک بۆ بەشداریی لە جەنگی ڕووسیا، لە عێراق کەسێک بە زیندانی هەتاهەتایی سزا درا

پەیام 

دادگای تاوانەكانی پارێزگای نەجەف بە تۆمەتی ناردنی هاوڵاتیی عێراقی بۆ ریزەكانی سوپای ڕووسیا بۆ جەنگی ئۆكرانیا، سزای زیندانیی هەتاهەتایی بەسەر كەسێكدا سەپاند.

ئەنجومەنی باڵای دادوەریی عێراق ڕایگەیاند: دادگای نەجەف بە تۆمەتی بازرگانیی بە مرۆڤ"و بەپێی مادەی شەش و سێ و حەوتی یاسای بازرگانیی بە مرۆڤ سزای زیندانییكردنی بەسەر كەسێكدا سەپاندووە كە كاری ناردنی خەڵك بۆ ڕووسیا بووە بە مەبەستی بەشداریی لە جەنگی ئەو وڵاتە و ئۆكرانیا.

بەپێی ڕاگەیەنراوێكی ئەنجوومەنی باڵای دادوەری "كەسی سزادراو، لەگەڵ چەند تۆمەتبارێكی دیكە لە بەرانبەر پارەدا خەڵكی كۆ كردووەتەوە و ناردوویەتی بۆ ڕووسیا بە ئامانجی پەیوەندییكردنی ئەو كەسانە بە ڕیزەكانی سوپای ئەو وڵاتە و شەڕكردن لە جەنگی ئۆكرانیادا".

بەپێی ئامارێكی نافەڕمی، لە سەرەتای سەرهەڵدانی جەنگی ئۆكرانیاوە نزیكەی پێنج هەزار عێراقی لەژێر ناوی گەشتیاریی چوونەتە ڕووسیا و لەوێ پەیوەندییان بە ڕیزەكانی سوپای ئەو وڵاتەوە كردووە، ژمارەیەكیشیان كوژراون.

پێشتریش لیژنەی دەرەوەی ئەنجوومەنی نوێنەرانی عێراق دانی بەوەدا نا كە هاووڵاتیانی وڵاتەكەی لەگەڵ سوپای ڕووسیادا بەشداریی جەنگی ئۆكرانیا دەكەن.